Live Updates

’بہت نقصان ہو چکا‘ فواد چوہدری کا قومی حکومت تشکیل دینے کا مشورہ

اس وقت انسداد دہشتگردی عدالتوں میں سب سے زیادہ پی ٹی آئی کے کیسز چل رہے ہیں، اگر عمران خان اور ہم دہشت گرد ہیں پھر تو بات ہی ختم ہوگئی؛ سابق وفاقی وزیر کی میڈیا سے گفتگو

ساجد علی بدھ 19 مارچ 2025 13:32

’بہت نقصان ہو چکا‘ فواد چوہدری کا قومی حکومت تشکیل دینے کا مشورہ

لاہور ( اُردو پوائنٹ اخبارتازہ ترین۔ 19 مارچ 2025ء ) سابق وفاقی وزیر فواد چوہدری نے مشورہ دیا ہے کہ بہتر ہے ایک قومی حکومت تشکیل دی جائے اور پاکستان کو آگے لے کر چلیں۔ انسداد دہشتگردی کے عدالت کے باہر میڈیا سے گفتگو کرتے ہوئے انہوں نے کہا کہ اس وقت انسداد دہشت گردی عدالتوں میں سب سے زیادہ پی ٹی آئی کے کیسز چل رہے ہیں، اگر بانی چیئرمین پی ٹی آئی عمران خان اور ہم دہشت گرد ہیں پھر تو بات ہی ختم ہوگئی۔

سابق وفاقی وزیر کا کہنا ہے کہ قومی سلامتی کی پارلیمانی کمیٹی کے اجلاس میں عمران خان کو نہیں بلایا گیا تو محمود خان اچکزئی بھی نہیں آئے، بہتر ہے ایک قومی حکومت تشکیل دی جائے اور پاکستان کو آگے لے کر چلیں کیوں کہ اب تک بہت نقصان ہو چکا ہے، ہماری لیڈر شپ میں وہ چیز نہیں آئی کہ وہ لوگوں کو اکٹھا کرسکے بتایا گیا ہے کہ انسداد دہشتگردی کی خصوصی عدالت نے سابق وفاقی وزیر فواد چوہدری کی عبوری ضمانت میں 16 اپریل تک توسیع کر دی، انسداد دہشتگردی کی خصوصی عدالت میں فواد چوہدری کی 5 مقدمات میں عبوری ضمانت سے متعلق سماعت ہوئی، سابق وفاقی وزیر عدالت میں حاضری کیلئے پیش ہوئے، دوران سماعت فواد چوہدری کے وکیل نے کہا کہ ’ہم نے تمام مقدمات کو یکجا کرنے کی درخواست دائر کر رکھی ہے، ایک ہی واقعے پر الگ الگ ایف آئی آر درج ہیں، ایک کیس میں فیصل آباد میں ٹرائل شروع ہوچکا ہے، ہائیکورٹ میں درخواست کے فیصلے تک مہلت دی جائے‘۔

(جاری ہے)

اس پر عدالت نے کہا کہ ’اگر آپ دلائل نہیں دینا چاہتے تو ضمانت واپس لے لیں‘ جب کہ تفتیشی افسر نے مؤقف اپنایا کہ ’فواد چوہدری شامل تفتیش ہو چکے ہیں‘، پراسیکیوٹر نوید نیئر نے کہا کہ ’مقدمات میں تفتیش مکمل ہو چکی ہے‘، بعدازاں عدالت نے فواد چوہدری کی عبوری ضمانت میں 16 اپریل تک توسیع کرتے ہوئے سماعت ملتوی کردی، فواد چوہدری پر لاہر کے علاقہ مغلپورہ، زمان پارک اور جناح ہاؤس کے قریب چوک میں پولیس کی گاڑیاں جلانے کے 5 مقدمات درج ہیں۔