اسلام آباد (اُردو پوائنٹ اخبارتازہ ترین - اے پی پی۔ 20 مارچ2025ء) انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی) میں ”کرتار پور راہداری: امن اور ہم آہنگی کے لیے پاکستان کے اقدامات“ کے عنوان سے جمعرات کو ایک سیمینار کا انعقاد ہوا، پنجاب کے وزیر برائے اقلیتی امور سردار رمیش سنگھ اروڑہ اس موقع پر مہمان خصوصی تھے۔ کرتار پور راہداری کو اقوام متحدہ کے سیکرٹری جنرل انتونیو گوٹیرس نے ”امید کی راہداری“ کے طور پر سراہا ہے اور یہ بین المذاہب ہم آہنگی، اقلیتوں کے حقوق کے تحفظ اور پرامن اور تعاون پر مبنی ہمسائیگی کے لیے پاکستان کے عزم کی علامت ہے۔
سردار رمیش سنگھ اروڑہ کے علاوہ دیگر مقررین میں سابق وزیر مملکت ڈاکٹر رمیش کمار وانکوانی، سابق چیئرمین اسلامی نظریاتی کونسل قبلہ ایاز اور اور صحافی ہرمیت سنگھ شامل تھے۔
(جاری ہے)
اس موضوع پر اپنے خیالات کا اظہار کرتے ہوئے مہمان خصوصی سردار رمیش سنگھ اروڑہ نے کہا کہ کرتارپور کوریڈور کا قیام ہر پاکستانی کے لیے فخر کی بات ہے، جب راہداری بن رہی تھی تو پاکستان کی ہر سیاسی جماعت نے اسے قومی منصوبے کے طور پر مکمل سپورٹ کیا، اس سے ریاست کی ترجیح کی بھی عکاسی ہوتی ہے جو پاکستان میں اقلیتوں کے حقوق کو یقینی بنانا ہے۔
انہوں نے کہا کہ بھارت ایک سیکولر ملک ہونے کا دعویٰ کرتا ہے، آج بھی وہاں سکھوں کی شادیاں ہندو قوانین کے تحت رجسٹرڈ ہیں۔ دوسری جانب پاکستان میں سکھوں کی شادیاں سکھ میرج ایکٹ کے تحت رجسٹرڈ ہوتی ہیں جس کا نفاذ گزشتہ سال ہوا تھا۔ سردار رمیش سنگھ اروڑہ نے کہا کہ اگرچہ گرو نانک کا پیغام محبت، امن اور امید تھا لیکن بعض طاقتیں جو پاکستان کو غیر مستحکم کرنا چاہتی ہیں اس پیغام کو پٹڑی سے اتارنے پر تلی ہوئی ہیں۔
انہوں نے کہا کہ کرتار پور میں گوردوارہ دربار صاحب جانے والے سکھ یاتریوں میں 72 فیصد اضافہ ہوا ہے، بھارت سے آنے والے اپنے ساتھ محبت اور مہمان نوازی کی یادیں واپس لے جاتے ہیں۔ انہوں نے کہا کہ حکومت پاکستان کم از کم 46 مزید گوردواروں اور ہندو و بدھ مت کے دیگر مذہبی مقامات کی بحالی کا ارادہ رکھتی ہے۔ قبل ازیں اپنے خیرمقدمی کلمات میں ڈائریکٹر جنرل آئی ایس ایس آئی سہیل محمود نے کہا کہ کرتار پور راہداری کے افتتاح کے پانچ سال مکمل ہونے کے بعد 22 اکتوبر 2024 کو پاکستان اور بھارت نے مزید پانچ سال کے لیے گرودوارہ دربار صاحب کرتارپور جانے والے زائرین کی سہولت کے لیے اپنے معاہدے کی تجدید پر اتفاق کیا۔
بھارت میں سکھ برادری کی یہ ایک دیرینہ خواہش تھی کہ وہ اپنے مقدس ترین مذہبی مقامات میں سے کسی ایک تک رسائی حاصل کریں۔ انہوں نے کہا کہ اس اقدام سے صرف چند ماہ قبل 5 اگست 2019 کو بھارت نے جموں و کشمیر کی بین الاقوامی سطح پر متنازعہ حیثیت کو تبدیل کرنے اور مقبوضہ علاقے کے آبادیاتی ڈھانچے کو تبدیل کرنے کے لیے غیر قانونی اور یکطرفہ اقدامات کیے۔
بھارتی اقدامات کے بعد کے مہینوں میں کشیدگی میں اضافہ ہوا، اس کے باوجود حکومت پاکستان نے کرتار پور راہداری منصوبے کو ان پیش رفتوں سے منفی طور پر متاثر نہ ہونے دینے کا انتخاب کیا۔ انہوں نے کہا کہ پاکستان سکھ برادری کے ساتھ اپنے وعدے کو پورا کرنے میں ثابت قدم رہا، پاکستان مذاکرات اور امن کے اپنے عزم پر ثابت قدم ہے۔ انہوں نے کہا کہ پاکستان کا کرتار پور جیسے اقدامات زیادہ تعاون پر مبنی علاقائی ماحول کی طرف قدم بڑھا سکتے ہیں۔
ابوبکر آفتاب قریشی نے کہا کہ بابا گرو نانک نے 1504 عیسوی میں کرتارپور کی بنیاد رکھی، پانچ صدیاں پہلے کسی کو نہیں معلوم تھا کہ ایک دن یہ بھارت اور پاکستان کی سرحد پر واقع ہوگا۔ بھارت اور پاکستان کے درمیان پوری سرحد کشیدگی کا شکار ہے لیکن یہ خاص حصہ پرامن ہے۔ انہوں نے کہا کہ امن کے مقصد کو فروغ دینے کے لیے پاکستان نے مخالف ملک کے لوگوں کو ویزا فری رسائی دینے کا فیصلہ کیا، راہداری دوسرے ملک کی اقلیتی برادری کے لیے بنائی گئی۔
انہوں نے کہا کہ پاکستان کی مخلصانہ کوششوں کا کوئی نتیجہ نہیں نکلا۔ انہوں نے امید ظاہر کی کہ مستقبل میں کسی دن یہ راہداری بھارت اور پاکستان کے درمیان دو طرفہ مذاکرات کا مقام بن سکتی ہے۔ ڈائریکٹر انڈیا اسٹڈی سینٹر ڈاکٹر خرم عباس نے اپنے خطاب میں کہا کہ کرتار پور راہداری امن اور ہم آہنگی کی علامت ہے۔ قبلہ ایاز نے اپنے خطاب میں اس موضوع کی اہمیت کو اجاگر کرتے ہوئے بین المذاہب ہم آہنگی کے بارے میں اسلام کے نقطہ نظر پر بات کی اور کہا کہ یہ غلط تصور کیا جاتا ہے کہ اسلام عدم برداشت کا مذہب ہے اور یہ پرامن بقائے باہمی پر یقین نہیں رکھتا۔
انہوں نے کہا کہ نبی کریم صلی اللہ علیہ وسلم اس سلسلے میں رول ماڈل ہیں۔ انہوں نے خاص طور پر میثاقِ مدینہ پر روشنی ڈالی جو اسلامی تاریخ کی بنیادی دستاویزات میں سے ایک ہے جس نے خاص طور پر مختلف گروہوں اور مذاہب کے درمیان پرامن بقائے باہمی کی بات کی ہے۔ انہوں نے کہا کہ بعد میں حضرت عمر فاروقؓ کے دور حکومت اور اس کے بعد مختلف مسلم خاندانوں نے اقلیتی برادریوں کے حقوق کے تحفظ کو یقینی بنایا۔
انہوں نے کہا کہ کرتارپور کوریڈور کے قیام کو بھی اسی جذبے سے دیکھا جانا چاہیے، راہداری کو مذہب کے علاوہ سفارتی اہمیت بھی حاصل ہے۔ ہرمیت سنگھ نے سکھ مذہب سے تعلق رکھنے والے افراد کے لیے گوردوارہ دربار صاحب کرتارپور کی اہمیت کو اجاگر کیا۔ انہوں نے کہا کہ بابا بھلے شاہ، بابا فرید اور گرو نانک نے پنجاب کی سرزمین نے ہمیشہ محبت کا پیغام دنیا بھر میں پھیلایا ہے۔
ڈاکٹر رمیش کمار وانکوانی نے کرتارپور کوریڈور کے قیام کے پاکستان کے فیصلے کو سراہتے ہوئے کہا کہ پاکستان پرامن بقائے باہمی کے لیے ریاست مدینہ کے بعد ایک ماڈل ریاست بن گیا ہے۔ انہوں نے اس بات پر زور دیا کہ پاکستان میں مذہبی سیاحت کو فروغ دیا جانا چاہیے جس سے ملک کو اقتصادی لحاظ سے مدد ملے گی، پاکستان کا ایک سافٹ امیج سامنے آئے گا اور دہشت گردی اور انتہا پسندی کے خلاف جنگ میں مدد ملے گی۔ تقریب میں مختلف شعبہ ہائے زندگی سے تعلق رکھنے والے افراد نے شرکت کی جن میں طلبائ، اکیڈمی کے اراکین اور مختلف تھنک ٹینکس کے نمائندے شامل تھے۔
