دہشت گردوں سے غیر روایتی انداز میں نمٹیں گے، بلوچستان حکومت

جعفر ایکسپریس حملے میں بیرونی عناصر ملوث ہیں ، ہم نے ہمیشہ مذاکرات کی با ت کی ہے،وزیراعظم نے بھی بات چیت کی دعوت دی ہے، ترجمان بلوچستان حکومت شاہد رند کی ظہور بلیدی اور شعیب نوشیروانی کے ہمراہ پریس کانفرنس

فیصل علوی جمعہ 28 مارچ 2025 15:25

دہشت گردوں سے غیر روایتی انداز میں نمٹیں گے، بلوچستان حکومت

کوئٹہ(اردوپوائنٹ اخبار تازہ ترین۔28 مارچ 2025)بلوچستان کے صوبائی وزراءظہور بلیدی اور شعیب نوشیروانی و ترجمان بلوچستان حکومت شاہد رند کا کہنا ہے کہ دہشتگردوں سے غیر روایتی انداز میں نمٹیں گے،جعفر ایکسپریس حملے میں بیرونی عناصر ملوث ہیں ، دہشتگردی میں ملوث افراد کا پیچھا کریں گے،کوئٹہ میں پریس کانفرنس کرتے ہوئے صوبائی وزراءاور ترجمان بلوچستان حکومت نے صوبے میں دہشتگردی کے بڑھتے ہوئے واقعات کی سخت مذمت کرتے ہوئے کہا کہ جعفر ایکسپریس ٹرین حملے میں مسافروں کو یر غمال بنا کر قتل کیا گیا۔

بلوچستان میں بے گناہوں کو مارا جا رہا ہے۔کون دہشتگرد ہے کون نہیں یہ فرق واضح کرنا ضروری ہے۔ بلوچستان اسمبلی مذاکرات کا سب سے بڑا فورم ہے۔ وزیراعظم شہباز شریف نے بھی بات چیت کی دعوت دی ہے۔

(جاری ہے)

پریس کانفرنس سے خطاب کرتے ہوئے ترجمان بلوچستان حکومت شاہد رند کا کہنا تھا کہ موبائل نیٹ ورک سیکیورٹی خدشات کے باعث بند کیا گیا۔ ہم نے ہمیشہ مذاکرات کی با ت کی ہے۔

مذاکرات کے حوالے سے پالیسی واضح کر چکے ہیں۔ امن وامان کا ایک اجلاس ان کیمرا ہوا ہے۔ صوبے کی تاریخ میں پہلی بار یہ اجلاس ہوا۔انہوں نے کہا کہ ان کیمرہ اجلاس میں تمام اراکین ا سمبلی کو اعتماد میں لیا گیا۔ ہم سمجھتے ہیں مسائل بیڈ گورننس کی وجہ سے ہیں۔کوئٹہ میں ایک ہفتے سے دہشت گردی کا سنگین خطرہ تھا۔چند ہفتوں میں دو دہائیوں کے مسائل حل کرنا ممکن نہیں۔

صوبائی حکومت نے پروونشل ایکشن پلان ترتیب دیا ہے۔ اکتوبر سے اس پرعملدرآمد شروع کیا گیا۔پریس کانفرنس سے خطاب کرتے ہوئے صوبائی وزیر شعیب نوشیروانی کا کہنا تھا کہ دہشتگردوں سے غیر روایتی انداز میں نمٹیں گے۔دہشت گرد معصوم افراد کو قتل کر رہے ہیں۔انہوں نے کہا کہ صوبے میںبے گناہ لوگوں کو شہید کیا جا رہاجس کی ہم مذمت کرتے ہیں۔اس ظلم اور بربریت کے خلاف بھرپور ایکشن ہوگا ۔

بیرونی عناصران دہشتگردوں کی مدد کر رہے ہیں۔اس موقع پرصوبائی وزیر ظہور بلیدی نے پریس کانفرنس کے دوران کہا کہ بلوچستان میں موجودہ کارروائیاں سی پیک کو ناکام بنانے کی کوشش ہے۔ کل کے دھماکے میں ایک ڈاکٹر کو بھی شہید کیا گیا۔ ایسے واقعات کی مثال پوری دنیا میں نہیں ملتی۔ان کا کہنا تھا کہ دہشتگردی کا کوئی مذہب نہیں ہے۔دہشتگردی میں ملوث افراد کا پیچھا کریں گے۔