Live Updates

4 اکتوبر احتجاج کیس؛ عدالت نے تمام مقدمات میں عمر ایوب کی ضمانت کنفرم کردی

یہ نوابوں کی طرح آتے ہیں میں ان کا ملازم نہیں ہوں، میں آئی جی یا ڈی آئی جی کا ملازم نہیں ہوں؛ جج ابو الحسنات محمد ذوالقرنین ریکارڈ کی عدم دستیابی پر برہم

ساجد علی جمعرات 10 اپریل 2025 10:58

4 اکتوبر احتجاج کیس؛ عدالت نے تمام مقدمات میں عمر ایوب کی ضمانت کنفرم ..

اسلام آباد ( اُردو پوائنٹ اخبارتازہ ترین۔ 10 اپریل 2025ء ) عدالت کی جانب سے 4 اکتوبر احتجاج کیس کے تمام مقدمات میں اپوزیشن لیڈر عمر ایوب کی ضمانت کنفرم کردی گئی۔ تفصیلات کے مطابق انسداد دہشت گردی عدالت اسلام آباد نے 4 اکتوبر احتجاج کیس کے تمام مقدمات میں پی ٹی آئی رہنماء عمر ایوب کی ضمانت کنفرم کردی، عدالت نے 5 5 ہزار روپے کے مچلکوں کی عوض ضمانتیں منظور کرلیں۔

بتایا گیا ہے کہ دوران سماعت پراسیکیوٹر نے بتایا کہ ’ریکارڈ تفتیشی نے لے کر آنا ہے لیکن وہ ابھی تک نہیں آیا‘، جس پر جج ابو الحسنات محمد ذوالقرنین نے ریمارکس دیئے کہ ’یہ نوابوں کی طرح آتے ہیں میں ان کا ملازم نہیں ہوں، میں آئی جی یا ڈی جی کا ملازم نہیں ہوں‘۔ دوسری طرف جی ایچ کیو حملہ کیس کی اسلام آباد انسداد دہشت گردی کی خصوصی عدالت میں سماعت ہوئی جہاں اے ٹی سی جج امجد علی شاہ نے سماعت کی، سابق صوبائی وزیر پنجاب راجہ بشارت انسداد دہشت گردی کی خصوصی عدالت میں پیش ہوئے، عدالت میں وزیر اعلی خیبر پختونخواہ علی امین گنڈا پور کی بھی حاضری لگائی گئی۔

(جاری ہے)

بتایا جارہا ہے کہ سماعت کے دوران جی ایچ کیو حملہ کیس کے تمام 119 ملزمان کو طلبی کے نوٹس جاری کیے گئے، عدالت نے 2 گواہان کی طلبی کے بھی نوٹس جاری کردیئے، اس کے علاوہ اے ٹی سی عدالت کی جانب سے بانی چیئرمین پی ٹی آئی عمران خان کو بھی جیل عدالت میں پیش ہونے کا حکم دیا گیا جب کہ عدالت نے شاہ محمود قریشی کو لاہور جیل سے 12 اپریل کو پیش کرنے کا حکم دیا۔

معلوم ہوا ہے کہ عدالت نے آئندہ سماعت پر گواہان پر جرح کا بھی وکلائے صفائی کو حکم جاری کیا، عدالت نے جی ایچ کیو حملہ کیس تفتیشی ٹیم کو مکمل ریکارڈ سمیت اڈیالہ جیل پیش ہونے کا حکم دیا اور کہا کہ عدالت آئندہ تاریخ پر مجسٹریٹ مجتبیٰ اور گواہ سب انسپکٹر ریاض کی طلبی کا نوٹس جاری کرے گی، سپریم کورٹ کی 4 ماہ کی ڈائریکشن کے مطابق کیس کا فیصلہ کیا جائے گا، اس لیے آئندہ کسی بھی فریق کو بلاجواز التواء نہیں ملے گا اور اب سے ہفتہ میں 2 بار جی ایچ کیو حملہ کیس کی سماعت ہوگی، بعد ازاں عدالت نے جی ایچ کیو حملہ کیس کی سماعت 12 اپریل تک ملتوی کردی۔