پی ٹی آئی کو طعنے دینے والوں نے آئی ایم ایف کیساتھ 3 سالوں میں4 معاہدے کئے،شیخ وقاص اکرم

پشاور(اردوپوائنٹ اخبار تازہ ترین۔10اپریل 2025)پاکستان تحریک انصاف کے مرکزی سیکرٹری اطلاعا ت شیخ وقاص اکرم کا کہنا ہے کہ حکومت ناکام ہو کر ہمیں الزام دیتی ہے کہ ہم نے آئی ایم ایف کے ساتھ معاملات بگاڑے،ہم پر الزام لگایا کہ آئی ایم ایف کی بارودی سرنگیں پی ٹی آئی نے بچھائیں، پشاور میں صوبائی مشیر خزانہ مزمل اسلم کے ساتھ پریس کانفرنس کرتے ہوئے پی ٹی آئی کے مرکزی سیکرٹری اطلاعات نے کہا کہ پی ٹی آئی کو طعنے دینے والوں نے آئی ایم ایف کیساتھ 3 سالوں میں4 معاہدے کئے۔

آپ ہمیں بار بار بارودی سرنگوں کے طعنے دے رہے تھے۔ 8 فروری کے بعد ہی بارودی سرنگیں بچھائی ہوں گی۔حکومت کا یہ دعویٰ کہ آئی ایم ایف نے خسارے کے بڑھنے کے بعد خیبرپختونخواہ میں انتخابات نہ کرانے کی درخواست کی جو بالکل بے بنیاد ہے۔

(جاری ہے)

پریس کانفرنس کے دوران انہوں نے کہا کہ وزیراعظم کہتے ہیں سعودی عرب سے تعلقات بہتر کئے ہیں۔ انہوں نے اتنے چکر اسلام آباد کے نہیں لگائے جتنے سعودی عرب کے لگائے ہیں۔

اتنے چکر کے بعد کیا کوئی پراجیکٹس لے کر آئے ؟۔ ان کی ساری ٹیم یہاں آئی لیکن آپ اتنے نالائق ہیں جو سعودی عرب سے ایک پراجیکٹ لے کر نہیں آئے۔ اب یہ 2 ارب پر آگئے ہیں۔بلاول بھٹو کہہ رہے تھے یہ پی ٹی آئی نہیں۔ پی ٹی آئی آئی ایم ایف ہے۔ انہوں نے الزام لگایا کہ آئی ایم ایف کی بارودی سرنگیں پی ٹی آئی نے بچھائیں۔ ہم انتظار کر رہے ہیں پی ڈی ایم ون اور ٹو بتائے آپ نے کونسی ڈیل ختم کی۔

حکومت بار بار یہ کہتی ہے کہ یہ ان کا آخری آئی ایم ایف پروگرام ہوگا لیکن یہ وہ وزیراعظم ہیں جنہوں نے 3 سال کے دوران 4 آئی ایم ایف معاہدے کئے ہیں۔ جب ہماری حکومت کو ہٹایا گیا تو سب سے پہلا الزام پاکستان پر یہ لگایا گیا کہ وہ عالمی سطح پر تنہا ہو رہا ہے، قوم کو بھی پتا چلنا چاہئے ہم کونسی آئسولیشن میں تھے۔اس موقع پر پریس کانفرنس سے خطاب کرتے ہوئے مشیرخزانہ خیبرپختونخواہ مزمل اسلم کاکہنا تھا کہ بانی پی ٹی آئی کے دور میں صنعت ڈبل ڈیجٹ میں گروتھ کر رہی تھی اس کے بعد ہر سال صنعت نے منفی گروتھ کی۔

2025 میں غربت بڑھ کر 40.5 فیصد ہو گئی ہے۔بانی پی ٹی آئی کی حکومت کے خاتمے کے بعد 31 ارب ڈالر لوگوں نے باہر سے بھجوائے۔ ہماری حکومت کے خاتمے کے وقت شرح نمو 6.5 اور اب 3فی صد ہے۔آئی ایم ایف کے کہنے پر انہوں نے رئیل اسٹیٹ کو کوئی ریلف نہیں دیا۔مزمل اسلم نے کہا کہ پاکستان کی تاریخ میں اس وقت سب سے کم شرح نمو دیکھنے کو مل رہی ہے۔ انہوں نے سوال کیا کہ معیشت کو بحال کرنے والے بتائیں کہ آخر یہ شرح نمو اتنی نچلی سطح پر کیسے آ گئی؟۔

انہوں نے کہا کہ بانی پی ٹی آئی عمران خان کی حکومت میں بیروزگاری 2.6 فیصد تھی وہ اب بڑھ کر 6 فیصد سے اوپر چلی گئی ہے۔ پاکستان کی 50 فیصد سے زیادہ آبادی غربت کی لکیر سے نیچے چلی گئی ہے، لوگ ملک چھوڑ کر جا رہے ہیں۔ یہ کونسی معاشی ترقی ہو رہی ہے؟ جب یہ معیشت اچھی کرنے آئے لوگ اپنی گاڑیاں بیچنے پر آگئے۔موجودہ حکومت کے 3 سالوں میں آئی ایم ایف سے 4 پروگرام لئے گئے جس کا اثر صنعت کی منفی گروتھ اور بڑھتی ہوئی مہنگائی پر ہوا۔مزمل اسلم کا مزید کہنا تھا کہ 1 کروڑ سے زیادہ لوگ بے روزگار ہو چکے ہیں اور بے روزگاری کے باعث 2022 میں 8 لاکھ لوگ ملک چھوڑ کر گئے۔ 2023 میں 8 لاکھ اور 2024 میں 9 لاکھ لوگ پاکستان چھوڑ کر چلے گئے۔