Live Updates

صاحبزادہ حامد رضا، علامہ راجہ ناصرعباس کو عمران خان سے ملاقات کرنے سے روک دیا گیا

عمر ایوب، نیاز اللہ نیازی اور کرنل (ر)امیر اللہ مروت بھی بانی پی ٹی آئی سے ملاقات کیلئے جیل کے باہر پہنچ گئے،عمران خان سے آج فیملی اور پارٹی رہنماﺅں کی ملاقات کا دن ہے

فیصل علوی جمعرات 10 اپریل 2025 17:15

صاحبزادہ حامد رضا، علامہ راجہ ناصرعباس کو عمران خان سے ملاقات کرنے ..

راولپنڈی(اردوپوائنٹ اخبار تازہ ترین۔10اپریل 2025)راولپنڈی کی اڈیالہ جیل کے باہر پولیس نے صاحبزادہ حامد رضا، پنجاب اسمبلی میں اپوزیشن لیڈر احمد خان بھچر ،علامہ راجہ ناصر عباس کو بانی پی ٹی آئی عمران خان سے ملاقات کرنے سے روک دیا، بانی پی ٹی آئی سے آج فیملی اور پارٹی رہنماﺅں کی ملاقات کا دن ہے ،قومی اسمبلی میں اپوزیشن لیڈر عمر ایوب، نیاز اللہ نیازی اور کرنل (ر)امیر اللہ مروت بھی بانی پی ٹی آئی سے ملاقات کیلئے جیل کے باہر پہنچ گئے۔

اڈیالہ جیل حکام کو بانی پی ٹی آئی عمران خان سے ملاقات کیلئے پارٹی کے سیکرٹری جنرل سلمان اکرم راجہ کی جانب سے فہرست دی گئی جن میں بانی پی ٹی آئی کی بہنوں علیمہ خان، نورین نیازی، عظمیٰ خان اور قاسم زمان سمیت ،پی ٹی آئی رہنماء شبلی فراز،نیاز اللہ نیازی، عمر ایوب،صاحبزادہ حامد رضا،علامہ راجہ ناصر عباس اور ملک احمد خان بھچر کے نام شامل کئے گئے تھے۔

(جاری ہے)

پولیس نے علامہ راجہ ناصر عباس، حامد رضا اور اپوزیشن لیڈر پنجاب اسمبلی احمد خان بچھر کو گورکھپور چیک پوسٹ پر آگے جانے سے روک دیا۔اس موقع پر میڈیا سے گفتگو کرتے ہوئے علامہ راجہ ناصر عباس نے اڈیالہ جیل کے باہر میڈیا سے گفتگو کرتے ہوئے کہا کہ ملاقات کیلئے پہلے بھی انتظار کرواتے رہے اب بھی کروا رہے ہیں۔انہوں نے کہا کہ بانی پی ٹی آئی عمران خان سے ملاقات کیلئے جاری کردہ عدالتی احکامات نہیں مانے جا رہے۔

پاکستان میں اس وقت نہ قانون ہے نہ آئین۔ صورت حال ایسی ہے کہ ملک کو اس طرح نہیں چلایا جا سکتا۔کالے قوانین کے تحت ہر چیز تباہ کی جا رہی ہے اور عدلیہ کی کوئی حیثیت باقی نہیں رہی۔میڈیا سے گفتگو کرتے ہوئے پنجاب اسمبلی میں اپوزیشن لیڈر اس موقع پر احمد خان بچھر نے میڈیا سے گفتگو کرتے ہوئے کہا کہ ہمیں جیل کی طرف جانے سے روکا گیا ہے۔ یہ سب کچھ سب کے سامنے ہے۔ ممبران اسمبلی کو ملاقات سے روکا جا رہا ہے۔اس وقت ملک میں ملک میں نہ کوئی قانون ہے نہ جمہوریت۔عدالتوں کو بند کر دینا چاہیے۔