گورنر ہائوس میں اسرائیلی برانڈز ، غیر ملکی مصنوعات کے استعمال پر مکمل پابندی عائد

ایسی تمام اشیا ء جس سے اسرائیل اور غیر مسلموں کو مالی فائدہ پہنچے بائیکاٹ کرنا ہوگا‘ گورنر پنجاب

اتوار 13 اپریل 2025 21:25

گورنر ہائوس میں اسرائیلی برانڈز ، غیر ملکی مصنوعات کے استعمال پر مکمل ..

لاہور(اُردو پوائنٹ اخبارتازہ ترین - این این آئی۔ 13 اپریل2025ء)گورنر پنجاب سردار سلیم حیدر خان نے گورنر ہائوس لاہور میں اسرائیلی برانڈز ،غیر ملکی مشروبات اور مصنوعات کے استعمال پر مکمل پابندی کردی۔گورنر پنجاب سردار سلیم حیدر خان نے کہا کہ پیپلز پارٹی واحد جماعت ہے جس نے بلاول بھٹو کو اپنا نوجوان چیئرمین منتخب کیا جس پر پارٹی اور عوام کو مبارکباد پیش کرتا ہوں۔

گورنر پنجاب سردار سلیم حیدر خان سے سابق وزیر اعظم راجہ پرویز اشرف، پنجاب اسمبلی میں پارلیمانی لیڈرحیدر علی گیلانی، سینئر رہنماچوہدری منظور اور پارٹی رہنمائوں نے ملاقاتیں کیں ، گورنر پنجاب نے ایران میں دہشتگردی کے واقعہ میں جاں بحق ہونے والے پاکستانیوں کے ورثاء سے اظہار تعزیت بھی کیا۔انہوں نے کہا کہ ایرانی حکومت سے مطالبہ ہے کہ دہشتگردی کے واقعہ میں ملوث افراد کو جلد گرفتار کر کے قرار واقعی سزا دی جائے۔

(جاری ہے)

ایران پاکستان دوستی میں خلل ڈالنے کی ناکام کوشش کی جارہی ہے، جاںبحق ہونے والے افراد کے لواحقین سے اظہار ہمدردی اور ہر ممکن تعاون کی یقین دہانی کرتے ہیں۔گورنر پنجاب سردار سلیم حیدر نے کہا کہ غزہ اور فلسطین کے نہتے مسلمانوں پر ظلم دیکھ کر دل خون کے آنسو روتا ہے، جب تک گورنر پنجاب ہوں گورنر ہائوس میں تمام غیر ملکی مشروبات اور منصوعات کے استعمال پر پابندی ہو گی، ایسی تمام اشیا ء جس سے اسرائیل اور غیر مسلموں کو مالی فائدہ پہنچے بائیکاٹ کرنا ہوگا۔