مسلم لیگ ن، پیپلز پارٹی پاور شیئرنگ کمیٹیوں کا اجلاس (آج )طلب

پ*اجلاس گورنر ہائوس میں ہوگا ،دونوں جماعتوںکے نمائندے شرکت کریں گے

ہفتہ 19 اپریل 2025 20:15

لاہور (اُردو پوائنٹ اخبارتازہ ترین - آن لائن۔ 19 اپریل2025ء) پنجاب میں مسلم لیگ (ن) اور پاکستان پیپلز پارٹی کے درمیان پاور شیئرنگ کے معاملے پر پیپلز پارٹی اور (ن) لیگ کی پاور شیئرنگ کمیٹیوں کے اجلاس آج ( اتوار ) طلب کر لئے گئے۔ذرائع کے مطابق حکومتی اتحادی پارٹیوں مسلم لیگ (ن) اور پیپلز پارٹی کا اجلاس آج بروز اتوار کو شام 4بجے گورنر ہائوس لاہور میں ہوگا۔

(جاری ہے)

پاور شیئرنگ اجلاس میں (ن) لیگ کی جانب سے رانا ثنا اللہ، سپیکر پنجاب اسمبلی ملک محمد احمد خان، سینئر صوبائی وزیر مریم اورنگزیب شرکت کرینگے، پیپلز پارٹی کی جانب سے گورنر پنجاب سردار سلیم حیدر، ندیم افضل چن، سید حسن مرتضی، سید علی حیدر گیلانی، سابق گورنر مخدوم سید احمد محمود شامل ہونگے۔ذرائع کا کہنا ہے کہ اجلاس میں چیف سیکرٹری پنجاب زاہد اختر زمان، آئی جی پنجاب ڈاکٹر عثمان انور سمیت دیگر افسران بھی شرکت کریں گے۔اجلاس میں پنجاب میں پاور شیئرنگ کے حوالے سے اب تک ہونے والی پیش رفت کا جائزہ لیا جائے گا، کوآرڈینیشن کمیٹی کی سب کمیٹی کی ملاقاتوں میں ہونے والے فیصلوں پر بھی مشاورت کی جائے گی۔