مسلم لیگ ن اور پیپلزپارٹی کا کینالز کے مسئلے کو بات چیت سے حل کرنے پراتفاق

رانا ثنااللہ کا شرجیل میمن سے ٹیلفونک رابطہ، نواز شریف اور شہباز شریف نے ہدایت کی ہے سندھ کے تحفظات کا خاتمہ کیا جائے، کینالز کے معاملے پر مذاکرات کے لیے تیار ہیں؛ مشیر وزیراعظم کی صوبائی وزیر سے گفتگو

ساجد علی اتوار 20 اپریل 2025 14:15

مسلم لیگ ن اور پیپلزپارٹی کا کینالز کے مسئلے کو بات چیت سے حل کرنے پراتفاق

اسلام آباد ( اُردو پوائنٹ اخبارتازہ ترین۔ 20 اپریل 2025ء ) مسلم لیگ ن اور پیپلزپارٹی نے کینالز کے مسئلے کو بات چیت سے حل کرنے پراتفاق کرلیا۔ تفصیلات کے مطابق وزیراعظم شہباز شریف اور مسلم لیگ ن کے صدر نواز شریف کی ہدایت پر وزیراعظم کے مشیر برائے سیاسی امور رانا ثنااللہ نے سندھ کے سینئر وزیر شرجیل انعام میمن سے ٹیلی فونک رابطہ کیا ہے، اس دوران دونوں رہنماؤں کی جانب سے بات چیت سے مسئلہ حل کرنے پر اتفاق کیا گیا۔

ترجمان سندھ حکومت نے اعلامیے میں بتایا کہ وزیر اعظم کے مشیر برائے سیاسی امور رانا ثنا اللہ نے سندھ کے سینئر وزیر شرجیل انعام میمن سے فون پر رابطہ کیا، اس دوران مختلف امور پر تبادلہ خیال کیا گیا، ٹیلیفونک گفتگو میں خاص طور پر دونوں رہنماؤں کے درمیان ملاقات کرکے کینال مسئلے کو بات چیت سے حل کرنے پر اتفاق کیا۔

(جاری ہے)

اس موقع پر رانا ثنا اللہ نے کہا کہ ’وزیر اعظم شہباز شریف اور میاں نواز شریف نے ہدایت دی ہے کہ سندھ کے تحفظات کا خاتمہ کیا جائے، کینالز کے معاملے پر سندھ کے ساتھ مذاکرات کے لیے تیار ہیں‘، جس پر شرجیل میمن نے جواب دیا کہ ’سندھ حکومت کینالز کے معاملے پر ہر فورم پر اپنا مؤقف پیش کر چکی ہے، پیپلز پارٹی اور سندھ کے عوام کو متنازعہ کینالز پر شدید تحفظات ہیں، پاکستان پیپلز پارٹی سندھ کے عوام کے لیے 1991ء کے معاہدے کے تحت پانی کی منصفانہ تقسیم چاہتی ہے، جس کے لیے پیپلز پارٹی بھی کینالز کے معاملے پر وفاقی حکومت سے مذاکرات کے لیے تیار ہے۔