جنوبی وزیرستان، پولیو ٹیم پر حملہ ناکام، پولیس سے مقابلے میں دہشتگرد ہلاک، ساتھی فرار

پیر 21 اپریل 2025 17:54

جنوبی وزیرستان (اُردو پوائنٹ اخبارتازہ ترین - این این آئی۔ 21 اپریل2025ء)خیبرپختونخوا مین جنوبی وزیر ستان کے علاقے میں پولیو ٹیم پر دہشتگردوں کا حملہ ناکام بنادیا گیا، اعظم ورسک تھانے کے عملے نے بہادری سے نصف گھنٹے تک دہشتگردوں سے مقابلہ کیا، اس دوران ایک دہشت گرد ہلاک، اس کے دیگر ساتھی فرار ہوگئے۔میڈیا رپورٹ کے مطابق نامعلوم دہشت گردوں نے تھانہ اعظم ورسک کے اسٹیشن ہاؤس آفیسر (ایس ایچ او) اور پولیس پارٹی پر کلوشہ کے علاقے میں حملہ کیا، ایس ایچ او اور پولیس پارٹی پولیو ڈیوٹی پر تھے، پولیس پارٹی اور دہشت گردوں کے درمیان فائرنگ کا تبادلہ تقریباً 30 منٹ تک جاری رہا۔

فائرنگ کے تبادلے میں ایک دہشت گرد مارا گیا، باقی دہشت گرد موقع سے فرار ہوگئے، ہلاک دہشت گرد سے ایس ایم جی اور راکٹ لانچر ملا، 2 موٹر سائیکلیں بھی برآمد کرلی گئیں۔

(جاری ہے)

حکام کے مطابق ہلاک دہشت گرد کی شناخت افنان ولد پیرزادہ کے نام سے ہوئی ہے، اس کی تلاشی کے دوران 2 شناختی کارڈز، 3 اے ٹی ایم کارڈز اور ایک اسمارٹ فون برآمد ہوا ہے۔برآمد کیے گئے کارڈز میں سے ایک ہلاک دہشت گرد کا تھا، باقی شہید کانسٹیبل عمران کے نکلے، جو عید سے قبل دہشت گردوں کے حملے میں شہید ہوئے تھے۔

شہید کانسٹیبل عمران کے قتل کا مقدمہ تھانہ محکمہ انسداد دہشتگردی (سی ٹی ڈی) جنوبی وزیرستان میں درج کیا گیا تھا۔علاقے میں سرچ آپریشن اور پولیو ٹیموں کی حفاظت کے لیے اضافی نفری اور اے پی سی روانہ کردی گئی ہے۔انسپکٹر جنرل آف پولیس (آئی جی پی) خیبر پختونخوا ذوالفقار حمید نے پولیس پارٹی کو شاباش دیتے ہوئے انعام دینے کا اعلان کیا ہے۔