سپیکر قومی اسمبلی سردار ایاز صادق کی گورنر مدینہ منورہ شہزادہ فیصل بن سلمان السعود سے ملاقات، دوطرفہ تعلقات سمیت باہمی دلچسپی کے امور پر تبادلہ خیال

بدھ 23 اپریل 2025 21:50

مدینہ منورہ (اُردو پوائنٹ اخبارتازہ ترین - اے پی پی۔ 23 اپریل2025ء) سپیکر قومی اسمبلی سردار ایاز صادق نے گورنر مدینہ منورہ شہزادہ فیصل بن سلمان السعود سے ملاقات کی جس میں دونوں ممالک کے درمیان دوطرفہ تعلقات سمیت باہمی دلچسپی کے امور پر تبادلہ خیال کیا گیا ۔ بدھ کو گورنر ہائوس مدینہ منورہ آمد پر گورنر مدینہ نے سپیکر قومی اسمبلی کا پرتپاک خیر مقدم کیا۔

ملاقات میں مسلم امہ کی یکجہتی، فلسطین کی نازک صورتحال اور دہشت گردی کے خلاف تعاون پر گفتگو کی گئی۔ سپیکر قومی اسمبلی نے خادم الحرمین الشریفین شاہ سلمان بن عبد العزیز اور ولی عہد شہزادہ محمد بن سلمان کے لیے نیک خواہشات کا اظہار کیا اور کہا کہ پاکستانی عوام مکہ مکرمہ و مدینہ منورہ سے دلی عقیدت رکھتے ہیں۔

(جاری ہے)

پاکستان اور سعودی عرب یک جان دو قالب کی مانند ہیں۔

سعودی عرب نے ہر مشکل وقت میں پاکستان کا بھرپور ساتھ دیا۔ انہوں نے کہا کہ پارلیمانی سفارتکاری دونوں اقوام کو مزید لانے میں کلیدی اہمیت کی حامل ہے۔پارلیمانی وفود کے تبادلے دوطرفہ تعلقات کے فروغ میں اہم کردار ادا کریں گے۔فلسطین کی بگڑتی صورتحال پر مسلم امہ کا اتحاد ناگزیر ہے۔اسرائیل فلسطین میں بے گناہ اور معصوم شہریوں کا خون بہا رہا ہے۔

اقوام عالم کو فلسطین میں جاری انسانی حقوق کی سنگین خلاف ورزیوں کا نوٹس لینا چاہیے۔گورنر مدینہ شہزادہ فیصل بن سلمان السعود نے سپیکر قومی اسمبلی سردار ایاز صادق کے جذبات اور تاثرات کو سراہا اورکہا کہ سعودی عرب پاکستان کے ساتھ تعلقات کو بڑی اہمیت دیتا ہے۔ گورنر مدینہ نےمسلم امہ کے اتحاد و یکجہتی پر زور دیا اور کہا کہ فلسطین میں قیام امن کے لیے مشترکہ کوششیں ناگزیر ہیں۔