پی ٹی آئی کا 29 واں یوم تاسیس ،عمران خان و دیگر پارٹی رہنمائوں کی رہائی کا مطالبہ ،قرارداد متفقہ طور پر منظور

․اسلام آباد (اُردو پوائنٹ اخبارتازہ ترین - این این آئی۔ 25 اپریل2025ء) پی ٹی آئی نے پارٹی کی29 ویں یوم تاسیس پر متفقہ طور پر منظور قرارداد میں عمران خان و دیگر پارٹی رہنمائوں کی رہائی کا مطالبہ کرتے ہوئے کہاہے کہ ملک میں جاری ظلم و فسطائیت تمام حدود و قیود پھلانگ چکا ہے، 26ویں آئینی ترمیم کے ذریعے عدلیہ کو کمزور کیا گیا،انتخابات میں پی ٹی آئی کا چرایا گیا مینڈیٹ عوام کے حق پہ ڈاکہ ،آئین پہ حملہ ہے واپس کیا جائے، ملکی دفاع کیلئے پاک افواج کے ساتھ پرعزم ہیں، بیرونی جارحیت پر بھرپور جواب دیں گے۔

جمعہ کو پی ٹی آئی کے 29واں یومِ تاسیس کے موقع پرمتفقہ طور پر منظور کی گئی قرارداد میں کہا گیا ہے کہ 25اپریل کو پی ٹی آئی کے یوم تاسیس پر انصاف کی تحریک کے 29سال پورے ہونے پر ہم اللہ تعالی کا شکر ادا کرتے ہیں، جہاں ہم اپنے رب کے شکر گزار ہیں وہیں ہم اپنے ملک کے لئے دعا گو بھی ہیں کہ اللہ ہمارے ملک پاکستان کی حفاظت فرمائے اور ہر قسم کے امتحان و آزمائش سے محفوظ رکھے۔

(جاری ہے)

قرارداد میں کہا گیا ہے کہ حالیہ بھارتی اقدامات و الزامات کی ہم سخت ترین الفاظ میں مذمت کرتے ہیں اور اس عزم کا اعادہ کرتے ہیں ہیں کہ ماضی کی طرح آج بھی پوری قوم اپنے ملک کے دفاع کے لئے اپنی پاک افواج کے ساتھ پوری طرح پر عزم ہے اور جس طرح ہمارے لیڈر عمران خان نے بطور وزیراعظم کہا تھا کہ ہم پاکستان پہ کسی بھی قسم کی بیرونی جارحیت ہونے کی صورت میں بھرپور جواب دینے کا صرف سوچیں گے ہی نہیں بلکہ بھرپور جواب دیں گے اور پوری پاکستانی قوم کا اپنے دشمن کو ایک ہی جواب ہوگا ۔

اللہ اکبر ۔ قرارداد میں کہا گیا ہے کہ ہم اپنے بانی قائد عمران خان کی ناجائز اسیری کی بھی بھرپور مذمت کرتے ہیں اور عمران خان سمیت تمام بے گناہ سیاسی اسیران بشمول وائس چیئرمین شاہ محمود قریشی کی رہائی کا پرزور مطالبہ کرتے ہیں۔ قوم نے اپنے لیڈر عمران خان کی کال پہ لبیک کہا اور 8فروری 2024ء کے الیکشن میں تحریک انصاف کو بھاری اکثریت سے کامیاب کیا، بدقسمتی سے تحریک انصاف کا مینڈیٹ چرا لیا گیا، یہ عوام کے حق پہ ڈاکہ اور آئین پہ حملہ ہے۔

ہم اپنے جائز مینڈیٹ کی واپسی کا پرزور مطالبہ کرتے ہیں۔ قرارداد میں کہا گیا ہے کہ ملک میں جاری ظلم و فسطائیت اپنے تمام حدود و قیود پھلانگ چکا ہے، ہم ملک میں جاری ظلم و فسطائیت کی پرزور مذمت کرتے ہیں اور ملک میں معطل شخصی سیاسی صحافتی آزادیوں اور بنیادی انسانی حقوق کی بحالی کا بھی پرزور مطالبہ کرتے ہیں۔ قرارداد میں کہا گیا ہے کہ 26ویں آئینی ترمیم کے زریعہ عدلیہ کو انتہائی کمزور کیا جا چکا ہے۔

ہم آئین کی اپنی اصل شکل میں بحالی و اعلی عدلیہ کے وقار کو بحال کرنے کا بھرپور مطالبہ بھی کرتے ہیں اور ساتھ ہی اس عزم کا بھی اظہار کرتے ہیں کہ تحریک انصاف اپنے قائد عمران خان کی قیادت میں اقتدار میں آکر اعلی عدلیہ کی خودمختاری و آزادی یقینی بنائیگی اور ملک کو صحیح معنوں میں آئین و قانون پہ چلانے کی بھرپور کوشش کرے گی۔ قرارداد میں کہا گیا ہے کہ تحریک انصاف صرف ایک سیاسی جماعت ہی نہیں بلکہ آئین و قانون کی حکمرانی اور ملک کو انصاف پہ چلانے کی ایک عظیم ترین پرامن عوامی سیاسی تحریک ہے، ہم اپنے قائد عمران خان کے وژن کے مطابق ہم آج اس عزم کا اظہار کرتے ہیں کہ ہم پاکستان کو مدینہ کی ریاست کی طرز پہ ایک عظیم اسلامی فلاحی ریاست بنا کرہی دم لیں گے اور ملک کو قرآن و سنت اور نبی آخر الزماں خاتم النبین حضرت محمد مصطفی صلی اللہ علیہ و آلہ وسلم کی تعلیمات کے مطابق چلائیں گے۔

انشااللہ۔ اللہ ہمارا حامی و ناصر ہو ۔پاکستان زندہ باد ۔