ہماری فوج اس لئے دنیا کی تگڑی فوج ہے کہ یہ اللہ اکبر کے نعرے پر چلتی ہے

اسلام آباد ( اردوپوائنٹ اخبار تازہ ترین۔ آئی پی اے ۔25 اپریل 2025ء )سینئر سیاستدان فیصل واوڈا نے کہاہے کہ ہماری فوج کواس لئے دنیا کی تگڑی فوج ہے کہ یہ اللہ اکبر کے نعرے پر چلتی ہے، اگر پانی پر مسئلہ بنا تو پہلا اسٹرائیک ہم لانچ کریں گے، توقع ہے کہ نوبت نیوکلیئرہتھیار استعمال کرنے کی حد تک نہیں جائے گی۔ انہوں نے سماء نیوز کے پروگرام میں گفتگو کرتے ہوئے کہا کہ بھارت کی کسی قسم کی جارحیت کاجواب دینے کی بھرپور تیاری ہے ،نیوکلیئرہتھیار استعمال نہ کرنے جارہے ہیں اور نہ ہی توقع ہے کہ نوبت اس حد تک جائے گی، میرا تجزیہ پوچھیں تو ایل اوسی یا کشمیر میں پٹاخے بج سکتے ہیں ، ہم بھارت کو جواب بھرپور اور ڈبل طاقت سے دیں گے، اگر اس جواب آیا تو پھر ہمارا مزید شدت سے جواب ہوگا، بھارت کی ہر کاروائی کا جواب بڑھتا جائے گا، جواب کہاں اور کس طرح دیا جائے گا یہ کمانڈاینڈ کنٹرول اور سکیورٹی اداروں کا کام ہے ۔

(جاری ہے)

ہم سرحد پر بارڈر پر جنگیں نہیں لڑتے، ہم اپنے فوج اور سکیورٹی اداروں کو اخلاقی اور سیاسی سطح پر بھرپور سپورٹ کررہے ہیں۔ اللہ کے کرم سے ہمیں آرمی چیف قابل ملا ہے، ہم نے گولی کی بجائے بڑی سمارٹ چال چلی ، بھارت کی ایئراسپیس اور ٹریڈ بند کردی۔ اس نقصان کا مقصد بھارت کو پتا چلنا چاہئے۔ ہم نے بھارت کی دھمکی کا جواب معاشی پتھر سے دیا ہے، ہماری فوج کواس لئے تگڑی فوج کہا جاتا ہے کہ یہ اللہ اکبر کے نعرے پر چلتی ہے۔

انہوں نے کہا کہ اگر پانی پر مسئلہ بنا تو پہلا اسٹرائیک ہم لانچ کریں گے، یہ حملہ ایسا ہوگا کہ ابھی نندن کا معاملہ پیچھے رہ جائے گا۔مزید برآں گزشتہ روز سینئر سیاسی رہنماء سینیٹر فیصل واوڈانے اے آروائی نیوز کے پروگرام میں گفتگو کرتے ہوئے کہا کہ بھارت کیخلاف جو اقدامات اٹھائے گئے ہیں اس کی وجہ اللہ کی رحمت سے ہمیں ایک قابل آرمی چیف ملاہے ، قابل آرمی چیف نے جب اپنی سمت بتائی جس میں سکیورٹی معیشت شامل ہے ، اس کو پوری دنیا دیکھ رہی ہے۔

آرمی چیف نے ایس آئی ایف سی کے تحت جو ویژن بتایا، جس میں ریکوڈک اور مائنز اینڈ منرل منصوبہ شامل ہے، ساری پروجیکشن آن ٹریک ہے،اس پر انڈیا ان سکیورٹی اور تھرتھراہٹ محسوس کررہا ہے۔اس وقت واضح ایکشن پلان اگر کسی کے پاس ہے تو وہ آرمی چیف کے پاس ہے ،گولہ بارود روائتی جنگیں ہیں، ہم اینٹ کا جواب پتھر سے دیں گے، جو ہم نے پہلے بھی دیا ہے۔انڈیا نے جھوٹا پروپیگنڈا کیا لیکن آرمی چیف کے ٹیکنیکل اور پریکٹیکل اقدامات نے بھارت کو حقیقت میں تکلیف دی ہے، پاکستان ایئراسپیس بند کردی، ٹریڈ بندکردی، معاشی سطح پر پہلے دن ہی نشانہ بنا ڈالا۔

ہم نے بھارتی بیانات پر حقیقت میں نشانہ بنایا ہے۔انہوں نے کہا کہ کینیڈا میں انڈیا قتل میں رنگے ہاتھوں پکڑے گئے، امریکا میں کوشش کی گئی، یہ ہم نہیں کہہ رہے، پھر ہمارے 24شہری شہید کئے گئے۔ فیصل واوڈا نے کہا کہ انڈیا نے اس پروپیگنڈے میں اپنی فوج کو تباہ کردیا ہے کہ مقبوضہ کشمیر میں ہماری 8لاکھ فوج ہے۔ اس خطے میں ہمارے ہمسائے بھی بڑے تگڑے ہیں، پاکستانی فوج طاقتور فوج ہے لیکن ہمارا دوست چین بھی بڑا پاور فل ہے جو ہمارے ساتھ کھڑا ہے۔