Live Updates

پاکستان نے پہلگام واقعے پر غیرجانبدارانہ عالمی تحقیقات کی پیشکش کردی

بھارت نے بے بنیاد اور بلا ثبوت الزامات لگائے، پاکستان نے دہشتگردی کو ہمیشہ اور ہر شکل میں مسترد کیا اور اس کی مذمت کی، پاکستان یو این چارٹر پر عمل کرنے کی اپنی ذمہ داری نبھاتا رہے گا؛ وزیراعظم کا خطاب

ساجد علی ہفتہ 26 اپریل 2025 11:29

پاکستان نے پہلگام واقعے پر غیرجانبدارانہ عالمی تحقیقات کی پیشکش کردی

ایبٹ آباد ( اُردو پوائنٹ اخبارتازہ ترین۔ 26 اپریل 2025ء ) پاکستان کی جانب سے پہلگام واقعے پر غیرجانبدارانہ عالمی تحقیقات کی پیشکش کردی گئی، اس حوالے سے وزیراعظم شہباز شریف کہتے ہیں کہ بھارت نے پہلگام واقعے کے بعد بے بنیاد اور بلا ثبوت الزامات لگائے، پاکستان ایک ذمہ دار ریاست ہونے کے ناطے غیر جانبدارانہ عالمی تحقیقات کے لیے تیار ہے تاہم دھمکیاں ناقابل قبول ہیں۔

پاکستان ملٹری اکیڈمی کاکول میں کیڈٹس کی پاسنگ آؤٹ کی تقریب سے خطاب کرتے ہوئے انہوں نے کہا کہ سندھ طاس معاہدے کی خلاف ورزی کرتے ہوئے پاکستان کا پانی روکا گیا تو پوری قوت سے جواب دیں گے، پانی ہماری لائف لائن ہے جس پر کوئی سمجھوتہ نہیں کیا جائے گا، کسی کو بھی غلط فہمی میں نہیں رہنا چاہیئے، پاکستان کی مسلح افواج ہر قسم کی صورتحال سے نمٹنے کے لیے مکمل طور پر تیار ہیں، 25 کروڑ پاکستانی عوام متحد اور اپنی مسلح افواج کے ساتھ کھرے ہیں۔

(جاری ہے)

وزیراعظم کا کہنا ہے کہ پاکستان نے دہشتگردی کو ہمیشہ اور ہر شکل میں مسترد کیا اور اس کی مذمت کی ہے، پاکستان دنیا میں دہشتگردی سے متاثرہ سب سے بڑا متاثرہ ملک ہے، ہمارے 90 ہزار شہری دہشتگردی میں اپنی جانوں سے ہاتھ دھو بیٹھے، پاکستان کی معیشت نے اربوں ڈالر کا نقصان اٹھایا ہے، دنیا میں دہشتگردی سے سب سے زیادہ متاثرہ ملک پاکستان ہے، امن ہماری خواہش ہے لیکن اسے کمزوری نہ سمجھا جائے، پاکستان اقوام متحدہ کی سلامتی کونسل کے غیرمستقل رکن کی حیثیت سے دنیا بھر میں امن و سلامتی کا خواہاں ہے اور اس کے لیے اپنی کاوشیں جاری رکھے گا، یو این چارٹر پر عمل کرنے کی اپنی ذمہ داری نبھاتا رہے گا۔

انہوں نے کہا کہ افغانستان ہمارا پڑوسی اور برادر اسلامی ملک ہے، ہماری خواہش ہے کہ ان کے ساتھ پر امن بقائے باہمی کی بنیاد پر تعلقات ہوں لیکن بدقسمتی سے افغانستان کی سر زمین سے پاکستان میں دہشتگردی کی کارروائیاں ہو رہی ہیں، حال ہی میں نائب وزیراعظم اسحٰق ڈار نے کابل کا دورہ کیا اور باور کروایا کہ پاکستان افغانستان کے ساتھ اچھے اور پر امن تعلقات چاہتا ہے تاہم افغان سرزمین سے پاکستان میں حملے برداشت نہیں کیے جاسکتے۔