Live Updates

عامر عبدالغفار لون نے مودی کی گیدڑ بھبکیوں کو مسترد کردیا

کشمیری قیادت ،عوام بحیثیت قوم مسلح افواج کیساتھ مل کر بھارتی جارحیت کا منہ توڑ جواب دے گی،وزیر ماحولیات آزاد کشمیر

ہفتہ 26 اپریل 2025 17:50

مظفر آباد (اُردو پوائنٹ اخبارتازہ ترین - این این آئی۔ 26 اپریل2025ء)آزاد حکومت ریاست جموں وکشمیر کے وزیر ماحولیات عامر عبدالغفار لون نے بھارتی وزیراعظم نریندرمودی کی گیدڑ بھبکیوں کو مسترد کرتے ہوئے کہا ہے کہ بھارت سمیت ساری دنیا کو پیغام دیتے ہیں کہ کشمیری قیادت اور عوام بحیثیت قوم اپنی مسلح افواج پاکستان کے ساتھ مل کر بھارت کی جانب سے کسی بھی قسم کی جارحیت کا منہ توڑ جواب دے گی۔

بھارت کی جانب سے یکطرفہ طور پر سندھ طاس معاہدے کی معطلی کو یکسر مسترد کرتے ہیں بھارتی آبی جارحیت کا موثر جواب دیا جائے گا قومی سلامتی کمیٹی کے اعلامیے کی حمایت کرتے ہیں بھارت کے خلاف پوری قوم پاک فوج کے ساتھ کھڑی ہے اور بھرپور جوابی کاروائی کیلئے تیار ہے۔ان خیالات کا اظہار انھوں نے میڈیا سے گفتگو کرتے ہوئے کیا انھوں نے کہا کہ بھارت کی پہلگام کے سیاحوں کی ہلاکت کے واقع کے باعث سامنے آنے والی اپنی حکومتی و ریاستی کمزوریوں اور خود ساختہ کارروائیاں کر کے پاکستان کو بدنام کرنے اور پاکستان میں دہشت گردی کے واقعات میں بھارتی اداروں اور ایجنسیوں کے اہلکاران کے ملوث ہونے کے شواہد سے عالمی اداروں اور میڈیا کی توجہ ہٹانے کے لئے انتہائی مضخکہ خیز اوچھے ہتھکنڈے استعمال کر رہا ہے جس میں اس کو پہلے کی طرح آئندہ بھی کوئی کامیابی حاصل نہیں ہو گی اور اس طرح کی صورتحال کی آڑ میں پاکستان یا آزاد کشمیر کے خلاف اس کی کسی بھی بزدلانہ جارحانہ کارروائی کا افواج پاکستان اس کو منہ توڑ اور عبرتناک جواب دے گی۔

(جاری ہے)

ساری کشمیری اور پاکستانی قوم اپنی بہادر اور جرات مند فوج کے شانہ بشانہ ایک سیسہ پلائی ہوئی دیوار بن کر کھڑی ہے اور کھڑی رہے گی۔انھوں نے کہا کہ بھارتی گجرات کا قصائی نریندرمودی انسانیت کا قاتل ہے ان شاء اللہ ہم سب اپنی مسلح افواج کے ساتھ ہیں اور دشمن کو اینٹ کا جواب پتھر سے دیں گے۔