Live Updates

پاکستان ورلڈ میٹرولوجیکل آرگنائزیشن ایشیا 2 کا نائب صدر منتخب

بھارتی محکمہ موسمیات کے ڈائریکٹرجنرل مرونجے مہاپتراکی پاکستانی ڈی جی میٹ کو باقاعدہ فون کرکے مبارکباد

ہفتہ 26 اپریل 2025 18:35

اسلام آباد (اُردو پوائنٹ اخبارتازہ ترین - این این آئی۔ 26 اپریل2025ء)پاکستان ورلڈمیٹرولوجیکل آرگنائزیشن ایشیاء 2کانائب صدرمنتخب، بھارت، جاپان، کویت اور دیگر ممالک نے نائب صدر منتخب ہونے والے پاکستانی ڈی جی میٹ کو مبارکباد دی۔رپورٹ کے مطابق اقوام متحدہ کے تحت چلنے والے ادارے ورلڈمیٹرولوجیکل آرگنائزیشن کی ریجنل ایسوسی ایشن ایشیاء 2کے انتخابات جنیواء میں 23اپریل کو ہوئے جس میں خطے کے 35ممالک نے اپناحق رائے دہی استعمال کیا۔

سعودی عرب کے نمائندہ کو بلامقابلہ صدرمنتخب کرلیاگیا جب کہ نائب صدرکی نشست پر باقاعدہ الیکشن ہوا۔عراق کے نمائندہ نے الیکشن کمشنر کے فرائض سرانجام دیئے، پاکستان کی جانب محکمہ موسمیات کے ڈائریکٹرجنرل مہر صاحبزاد خان نے الیکشن میں حصہ لیا اور سری لنکا کی جانب سے پاکستانی نمائندہ مہرصاحبزادخان کو تجویزکیاگیا۔

(جاری ہے)

الیکشن کے دوران پاکستان کی مخالفت میں 4ووٹ کاسٹ ہوئے، بھارت، جاپان اور دیگرممالک کے نمائندوں کی جانب سے پاکستان کو مبارکباددی گئی۔

ذرائع کے مطابق بھارتی محکمہ موسمیات کے ڈائریکٹرجنرل مرونجے مہاپترانے پاکستانی ڈی جی میٹ کو باقاعدہ فون کرکے مبارکباد پیش کی۔صاحبزادخان ڈبلیوایم او کی ریجنل ایسوسی ایشن کی18نائب صدرمنتخب ہوئے ہیں، ورلڈمیٹرولوجیکل ایسوسی ایشن ایشیاء ریجن میں پاکستان کے علاوہ چین، جاپان، سعودی عرب، روس، کویت، قطر، یواے ای، عمان، بھارت، بنگلہ دیش، سری لنکا ،عراق ، مکاؤ سمیت 35ممالک شامل ہیں پاکستان1950سے ورلڈمیٹرولوجیکل آرگنائزیشن کا رکن ہے۔