Live Updates

پہلگام حملے کے پیچھے چھپا بھارت کا دہشتگرد چہرہ بے نقاب

مقبوضہ جموں و کشمیر میں قابض بھارتی فورسز نے مزید 5کشمیریوں کے گھر تباہ کر دئیے

اتوار 27 اپریل 2025 22:35

سرینگر(اُردو پوائنٹ اخبارتازہ ترین - این این آئی۔ 27 اپریل2025ء)پہلگام حملے کے پیچھے چھپا بھارت کا دہشتگرد چہرہ بے نقاب ہوگیا،مقبوضہ جموں و کشمیر میں قابض بھارتی فورسز نے مزید 5کشمیریوں کے گھر تباہ کر دئیے۔ذرائع کے مطابق پہلگام حملے کے پیچھے چھپا بھارت کا دہشتگرد چہرہ بے نقاب ہوگیاہے،مقبوضہ جموں و کشمیر میں قابض بھارتی فورسز نے مزید 5کشمیریوں کے گھر تباہ کر دئییان مکانات کو دھماکہ خیز مواد لگا کر اڑایا گیا، تباہ کیے گئے مکانات عام کشمیری لوگوں کے تھے۔

ذرائع کے مطابق تباہ ہونے والے گھر عامر نذیر وانی ، جمیل احمد، عدنان صفی ڈار، عامر احمد اور فاروق احمد کے والدین کے تھے۔ دھماکوں سے درجنوں قریبی مکانات کو بھی بڑے پیمانے پر نقصان پہنچا۔ ذرائع نے بتایاکہ گزشتہ 3دن میں7کشمیریوں کے آبائی گھروں کو تباہ کر دیا گیا،بھارتی فوج کی ناپاک کاروائی سے کئی خاندان بے گھر اور شدید پریشانی میں مبتلا ہیں۔

(جاری ہے)

دفاعی ماہرین نے کہاکہ بھارتی فوج کا مقصد کشمیریوں کے عزم کو توڑنا اور اجتماعی سزا دینا ہے، بھارت کشمیری مسلمانوں کی زمیں ہتھیانے کیلئے اسرائیلی ہتھکنڈے استعمال کر رہا ہے۔دفاعی ماہرین نے کہاکہ بھارت کشمیریوں کے گھروں کو مسمار کر کے انہیں بے گھر کر رہا ہے،یہ مہم مودی حکومت کے ہندوتوا ایجنڈے کا حصہ ہے۔ترجمان کل جماعتی حریت کانفرنس نے کہاکہ بھارت کا مقصد کشمیری عوام کو بے گھر اور بے دخل کرنا اور علاقے کے مسلم اکثریتی تشخص کو تبدیل کرنا ہے،مودی حکومت کے کشمیریوں پر ظلم کے باوجود مقبوضہ جموں کشمیر کے عوام بھارت کے سامنے ہتھیار نہیں ڈالیں گے۔

کل جماعتی حریت کانفرنس نے کہاکہ کشمیری عوام اقوام متحدہ کے تسلیم شدہ اپنے حق خودارادیت کے لیے جدوجہد کررہے ہیں۔انہوںنے کہاکہ بھارت کشمیریوں پر ظلم اور ہندوں کو ڈومیسائل جاری کررہا ہے، مقبوضہ کشمیر کو ہندو ریاست میں تبدیل کرنا مودی کی سازش ہے۔