Live Updates

پہلگام واقعے پر بھارتی حکومت کا بھانڈا پھوڑنے والی گلوکارہ پر غداری کا مقدمہ

پیر 28 اپریل 2025 19:15

نئی دہلی(اُردو پوائنٹ اخبارتازہ ترین - این این آئی۔ 28 اپریل2025ء)مقبوضہ کشمیر کے علاقے پہلگام میں ہونے والے حملے پر بھارتی حکومت، فوج، سیکیورٹی اداروں اور وزیر اعظم نریندر مودی کا بھانڈا پھوڑنے والی بھوجپوری گلوکارہ نیہا سنگھ راٹھوڑ کے خلاف غداری سمیت 10 الزامات کے تحت مقدمہ دائر کردیا گیا۔بھارتی نشریاتی ادارے کے مطابق نیہا سنگھ راٹھوڑ کی وائرل ہونے والی مختصر ویڈیو کے بعد ان کے خلاف ایک شہری کی درخواست پر لکھنومیںبھارتیہ نیئیا سنہتا اور انفارمیشن ٹیکنالوجی سمیت دیگر قوانین کے تحت مقدمہ دائر کیا گیا۔

گلوکارہ پر دائر مقدمے میں انہیں غدار قرار دیتے ہوئے ان پر حملے میں ہلاک ہونے والے افراد اور ان کے اہل خانہ کے جذبات مجروح کرنے کے الزامات بھی عائد کیے گئے۔

(جاری ہے)

مجموعی طور پر گلوکارہ پر 10 الزامات کے تحت مقدمہ دائر کرکے ان کے خلاف قانونی کارروائی شروع کردی گئی۔رپورٹ کے مطابق نیہا سنگھ راٹھوڑ کے خلاف لکھنو میں اس وقت مقدمہ دائر کیا گیا جبکہ ان کی ایک مختصر ویڈیو ایکس پر وائرل ہوئی، جسے پاکستان سے چلائے جانے والے ایک اکائونٹس کی جانب سے ری شیئر کیا گیا تھا۔

مختصر ویڈیو میں بھوجپوری گلوکارہ نے پہلگام واقعے کا بھارتی حکومت کا ڈراما قرار دیا تھا اور کہا تھا کہ واقعے کو بنیاد بنا کر نریندر مودی بہار میں ہونے والیانتخابات کے دوران ووٹ مانگیں گے۔انہوں نے ویڈیو میں کہا تھا کہ دوسرے ممالک کی جنگیں ایک فون کال پر رکوانے یا بند کروانے کے دعوے کرنے والے نریندر مودی اپنے ہی ملک میں ہونے والے واقعے کو نہیں روک پائے۔

نیہا سنگھ راٹھوڑ کا کہنا تھا کہ ایک طرف تو بھارتی حکومت پہلگام واقعے پر ڈراما رچا رہی ہے، تو دوسری طرف ہدایات کی جا رہی ہیں کہ مذکورہ واقعے پر کوئی سوال نہ کیا جائی بھوجپوری گلوکارہ کے خلاف دائر کیے گئے مقدمے میں کہا گیا ہے کہ نیہا سنگھ راٹھوڑ کی ویڈیو کو پاکستانی میڈیا اور پاکستانی عوام بھارت کے خلاف پروپیگنڈا کے طور پر استعمال کر کے خبریں بنا رہے ہیں۔آخری اطلاعات تک نیہا سنگھ راٹھوڑ کی گرفتاری عمل میں نہیں آئی تھی تاہم ان پر بغاوت، نسلی اور مذہبی فسادات پھیلانے سمیت حکومت پر الزامات لگانے جیسے الزامات کے تحت مقدمہ دائر کردیا گیا۔