ہماری حکومت نے بھارت کے سامنے سرنڈر کر دیا ہے، عمر ایوب

صرف بانی پی ٹی آئی ہی بھارت کو موثر جواب دے سکتے ہیں، اپوزیشن لیڈر کی میڈیا سے گفتگو

منگل 29 اپریل 2025 17:48

ہماری حکومت نے بھارت کے سامنے سرنڈر کر دیا ہے، عمر ایوب

اسلام آباد (اُردو پوائنٹ اخبارتازہ ترین - این این آئی۔ 29 اپریل2025ء)قومی اسمبلی میں اپوزیشن لیڈر عمر ایوب نے کہا ہے کہ ہماری حکومت نے بھارت کے سامنے سرنڈر کر دیا ہے، ان میں جواب دینے کی سکت نہیں ہے۔تحریک انصاف کے رہنما عمر ایوب نے جوڈیشل کمپلیکس میں میڈیا سے گفتگو کرتے ہوئے حکومت پر شدید تنقید کرتے ہوئے کہا کہ بھارت بار بار حملے کی دھمکیاں دے رہا ہے، وزیراعظم نے کاکول میں تقریر کے دوران ملک پر ضرب لگائی، وزیر اعظم اور ان کی کابینہ نے بھارت کے سامنے سرنڈر کر دیا ہے، ان میں جواب دینے کی سکت نہیں ہے۔

عمر ایوب نے کہا کہ صرف بانی پی ٹی آئی ہی بھارت کو موثر جواب دے سکتے ہیں۔انہوں نے کہا کہ وہ گزشتہ ایک ہفتے سے مسلسل خبردار کر رہے ہیں کہ بھارت حملہ کرنے والا ہے، لیکن حکومت دوستی کی پینگیں بڑھا رہی ہے اور تحقیقات کی پیشکش کر رہی ہے۔

(جاری ہے)

پی ٹی آئی رہنما نے کہا کہ پہلگام حملہ ہندوستان کی ناکامی ہے، پاکستان کا اس سے کوئی تعلق نہیں جبکہ بھارتی دھمکیوں کے مقابلے میں ہمیں تیار اور ردعمل میں واضح ہونا چاہیے تھا۔انہوںنے کہاکہ جہاں سے حملہ ہوا یا حملے کی کوشش کی گئی، وہاں ہمیں دشمن کو تباہ کرنے کا پیغام دینا چاہیے تھا۔عمر ایوب نے کہا کہ ایران سے 500 ارب روپے سے زائد کا تیل اسمگل ہو رہا ہے، جبکہ ہماری ریفائنریز بند پڑی ہیں۔