Live Updates

پاک بھارت جنگ کے بادل منڈلا رہے ہیں، ہماری سلامتی کو خطرہ ہوا تو ایٹمی ہتھیار بھی استعمال ہو سکتے ہیں،خواجہ آصف

چین نے تاریخی طور پر پاکستان کو سپورٹ کیا ،مسئلہ کشمیر میں چین بھی سٹیک ہولڈر ہے، وزیردفاع کی نجی ٹی وی سے گفتگو

منگل 29 اپریل 2025 21:20

اسلام آباد (اُردو پوائنٹ اخبارتازہ ترین - این این آئی۔ 29 اپریل2025ء)وزیردفاع خواجہ آصف نے کہا ہے کہ پاکستان اور بھارت پر جنگ کے بادل منڈلا رہے ہیں، سلامتی کو خطرہ ہوا تو ایٹمی ہتھیار بھی استعمال ہو سکتے ہیں۔نجی ٹی وی سے گفتگو کرتے ہوئے وزیر دفاع نے کہا کہ بھارت ہمیں نیوکلیئر حملے کی دھمکی دیتا ہے تو ہمارے پاس جواب کے سوا آپشن نہیں ہوگا۔

انہوں نے واضح کیا کہ آل آئوٹ وار کے امکان کو رد نہیں کیا جا سکتا۔ انہوں نے کہا کہ جب بھی واقعات ہوتے ہیں بھارت میں الیکشن ہورہے ہوتے ہیں، ہماری تیاری مکمل ہے، ہمارے بارڈر، پانی، فضاء اور زمین کور ہے۔وزیر دفاع نے کہا کہ ہم دنیا کو اپنا موقف بتارہے ہیں چین نے تاریخی طور پر پاکستان کو سپورٹ کیا ہے اور مسئلہ کشمیر میں چین بھی اسٹیک ہولڈر ہے، کشمیر کا ایک حصہ چین کے پاس بھی ہے۔

(جاری ہے)

انہوں نے کہا کہ پاکستان اور بھارت سے بہت سے ممالک نے رابطہ کیا ہے دنیا کو پتا ہے کہ پاکستان اور بھارت نیوکلیئر طاقتیں ہیں، خدانخواستہ حالات ہاتھ سے نہ نکل جائیں۔ انہوں نے کہا کہ بھارت میں جماعتیں کہہ رہی ہیں کہ ڈرامہ الیکشن کی وجہ سے کیا جارہا ہے، بھارت میں الیکشن ہیں اور یہ سارا ڈرامہ الیکشن کی وجہ سے ہی ہے ،بھارت کسی نہ کسی جارحیت پر تلا ہوا ہے جو صورتحال 4،5دن پہلے تھی اب بھی ویسی ہی ہے، بہتری نہیں آئی۔