Live Updates

وزیراعظم سے گلوبل چیف ایگزیکٹو آفیسر رائل فرائزلینڈ کمپینا اور اینگرو پاکستان جون ڈیرک وین کارنیبیک کی قیادت وفد کی ملاقات

پاکستان دنیا میں ڈیری مصنوعات بنانیوالے سرفہرست ممالک میں شامل ، ڈیری مصنوعات کی ویلیو ایڈیشن میں سرمایہ کاری کا خیرمقدم کریں گے، شہباز شریف

منگل 29 اپریل 2025 22:10

اسلام آباد(اُردو پوائنٹ اخبارتازہ ترین - این این آئی۔ 29 اپریل2025ء)وزیراعظم شہباز شریف نے کہا ہے کہ پاکستان دنیا میں ڈیری مصنوعات بنانے والے سرفہرست ممالک میں شامل ہے، ڈیری مصنوعات کی ویلیو ایڈیشن میں سرمایہ کاری کا خیرمقدم کریں گے۔وزیراعظم نے ان خیالات کا اظہار منگل کو یہاں گلوبل چیف ایگزیکٹو آفیسر رائل فرائزلینڈ کمپینا اور اینگرو پاکستان جون ڈیرک وین کارنیبیک کی زیر قیادت وفد سے گفتگو کرتے ہوئے کیا جس نے وزیراعظم سے یہاں ملاقات کی۔

ملاقات میں وزیراعظم نے کہا کہ پاکستان دنیا میں ڈیری مصنوعات بنانے والے سرفہرست ممالک میں سے ایک ہے، ڈیری مصنوعات کی ویلیو ایڈیشن میں سرمایہ کاری کا خیرمقدم کریں گے، پاکستان ڈیری کے شعبہ کی ترقی کے لیے فرائزلینڈ کمپینا جیسی کمپنیوں کے ساتھ تعاون کرے گا ،ڈیری مصنوعات کی برآمدات کو بڑھانے کے لیے ڈیری مصنوعات کی حفاظت اور غذائیت کو بڑھانے کے حوالیسے اقدامات کی حوصلہ افزائی کریں گے۔

(جاری ہے)

وزیراعظم نے کہا کہ ڈیری انڈسٹری کی پائیدار ترقی اور کسانوں کے روزگار کو بہتر بناناہماری اولین ترجیحات میں شامل ہے ،فرائزلینڈ کمپینا اینگرو پاکستان پاکستان ڈیری ریگولیشنز کو بین الاقوامی بہترین طریقوں سے ہم آہنگ کرنے کے لیے تکنیکی معاونت کا اشتراک کر سکتا ہے،ڈیری مصنوعات کی حفاظت اور صارفین کے اعتماد کو بہتر بنانے کے لیے پنجاب اور سندھ میں پائلٹ ڈیری سپلائی چین ٹریس ایبلٹی سسٹم تیار کرنے میں فرائزلینڈ کی مدد کو سراہتے ہیں۔

فرائزلینڈ کمپینا کے وفد نے پاکستان کے لائیو سٹاک اور ڈیری کے شعبے میں سرمایہ کاری بڑھانے میں دلچسپی کا اظہار کیا ۔ملاقات میں وفاقی وزیر قومی غذائی تحفظ رانا تنویر حسین ، وفاقی وزیر خزانہ و محصولات محمد اورنگزیب ، وزیراعظم کے معاون خصوصی ہارون اختر اور متعلقہ اعلیٰ سرکاری افسران بھی موجود تھے۔