Live Updates

پاکستانی حجاج کرام کو جدید ترین سہولیات فراہم کرنے کیلئے جامع انتظامات کیے گئے ہیں، عبدالوہاب سومرو

جمعرات 1 مئی 2025 21:30

مدینہ منورہ (اُردو پوائنٹ اخبارتازہ ترین - اے پی پی۔ 01 مئی2025ء) پاکستان حج مشن کے ڈائریکٹر جنرل عبدالوہاب سومرو نے کہا ہے کہ اس سال مکہ مکرمہ اور مدینہ منورہ میں پاکستانی حجاج کرام کو جدید ترین سہولیات فراہم کرنے کے لیے جامع انتظامات کیے گئے ہیں۔ یہاں جاری بیان کے مطابق انہوں نے بتایا کہ حکومت کی جانب سے گزشتہ سال مختصر حج پیکج متعارف کرایا گیا تھا جس کے تحت حجاج کو 2 یا 3 بستروں کے الگ کمرے میسر ہوں گے تاکہ انہیں زیادہ پرائیویسی اور سہولت حاصل ہو۔

حکومتی سکیم کے تحت 88,380 حجاج کے لیے اضافی رہائشی بندوبست کیا گیا ہے۔ منیٰ میں جدید ترین خیموں میں اے سی، صوفہ میٹرس، سامان رکھنے کی الماریاں اور جپسم بورڈ لگائے گئے ہیں۔ پاک حج موبائل ایپ حجاج کو منیٰ، عرفات میں اپنے خیمے تلاش کرنے میں مدد فراہم کرے گی۔

(جاری ہے)

ڈائریکٹر جنرل حج نے بتایا کہ وزیراعظم شہباز شریف، وزیر مذہبی امور سردار محمد یوسف اور سیکرٹری مذہبی امور ڈاکٹر سید عطاء الرحمان کی رہنمائی میں پاکستان حج مشن نے اللہ کے مہمانوں (حجاج) کی خدمت کو بہتر بنانے کے لیے ایک جامع منصوبہ بنایا ہے۔

انہوں نے کہا کہ ٹرانسپورٹ، رہائش اور کھانے پینے کے معیاری انتظامات مکمل کر لیے گئے ہیں تاکہ حجاج کرام کو روحانی سفر میں کوئی دشواری پیش نہ آئے۔ واضح رہے کہ سعودی عرب میں ڈی جی حج عبدالوہاب سومرو کی سرگرم قیادت میں 2025ء کا حج آپریشن کامیابی سے آگے بڑھ رہا ہے۔ مختلف خدمات فراہم کرنے والے سعودی اداروں کے ساتھ ہم آہنگی، مدینہ میں دوہرے کھانوں کی فراہمی، نئی بسیں اور فیملی رومز کی رہائش جیسی سہولیات اس سال کے حج کو گزشتہ سالوں سے بہتر بنانے میں اہم کردار ادا کر رہی ہیں۔

مکہ، مدینہ اور جدہ ایئرپورٹ پر پاکستان حج مشن کی ٹیم عازمین کرام کی بہترین خدمت کو یقینی بنانے کے لیے ہرممکن کوشش کر رہی ہے۔ تمام ترقیاتی اقدامات سے ظاہر ہوتا ہے کہ اس سال پاکستانی حجاج کو بہترین حج کا تجربہ ہو گا۔