ابدالی میزائل پاکستان کے دفاعی نظام میں اہم پیشرفت،ملک کی سالمیت کیلئے ہروقت جان قربان کرنے کیلئے تیار ہیں، رانا ثناء اللہ

فیصل آباد (اُردو پوائنٹ اخبارتازہ ترین - اے پی پی۔ 03 مئی2025ء) پاکستان مسلم لیگ (ن) کے سینئر رہنما اور وزیراعظم کے مشیر برائے سیاسی و سماجی امور رانا ثناء اللہ نے کہا ہے کہ پاکستان نے ابدالی میزائل کا کامیاب تجربہ کیا ہے جو ایٹمی ہتھیار لے جانے کی مکمل صلاحیت رکھتا ہے۔ آج یہاں مختلف چکوک کو گیس کی فراہمی کے منصوبے اور سدھار بائی پاس کے قریب گرلز کالج کا افتتاح کرنے کی تقریب کے موقع پر عوامی اجتماع سے خطاب کرتے ہوئے انہوں نے کہا کہ پاکستان کا ابدالی میزائل بھارت کو منہ توڑ جواب دینے کی صلاحیت رکھتا ہے۔

اُنہوں نے ابدالی میزائل کے تجربے کو پاکستان کے دفاعی نظام میں ایک اہم پیش رفت قرار دیتے ہوئے بھارت کو واضح پیغام دیا کہ اگر دشمن نے جارحیت کی تو پاکستان بھرپور جواب دے گا۔

(جاری ہے)

رانا ثناء اللہ نے کہا کہ ہماری میزائل ٹیکنالوجی دنیا کے کئی ترقی یافتہ ممالک سے کئی گنا بہتر ہے اور بھارت کو پاکستان کے گزشتہ تجربات کو یاد رکھنا چاہیے۔ اُنہوں نے کہا کہ ہم جنگ کے خواہاں نہیں اور نہ ہی کسی قسم کی جارحیت میں پہل چاہتے ہیں لیکن اگر بھارت نے پاکستان کی خودمختاری کو چیلنج کیا تو ہماری افواج اور قوم ہر طرح کے دفاع کے لیے تیار ہیں۔

انہوں نے آرمی چیف جنرل سید عاصم منیر کو ”مردِ مومن“ اور ”پکا مسلمان“ قرار دیتے ہوئے کہا کہ وہ پاکستان کی سالمیت کے لیے ہر وقت جان قربان کرنے کے لیے تیار ہیں۔ رانا ثناء اللہ نے قوم پر زور دیا کہ وہ پاکستان کے دشمنوں خصوصاً بھارتی وزیراعظم نریندر مودی کے خلاف اپنے قومی جذبات کو برقرار رکھیں کیونکہ مودی پاکستان کی آزادی، سلامتی اور معیشت کے خلاف سازشیں کر رہا ہے۔

انہوں نے کہا کہ مودی حکومت پاکستان کی معیشت کی بحالی کے راستے میں رکاوٹیں ڈالنے کے لیے آئی ایم ایف سے معاہدہ منسوخ کروانے اور مالی امداد کی قسط رکوانے کے لیے سرگرم ہے۔ انہوں نے کہا کہ ماضی میں بھی ایسی ہی کوششیں ”گالم گلوچ بریگیڈ“ کی طرف سے کی جاتی رہیں جو ملک کو دیوالیہ کرنے کے قریب لے گئی تھی۔ انہوں نے مزید کہا کہ انڈیا پہلگام واقعے کو کشمیریوں پر ظلم و ستم کے لیے استعمال کر رہا ہے لیکن کشمیری حقِ خود ارادیت لے کر رہیں گے اور کشمیر ایک دن ضرور آزاد ہو گا۔

رانا ثناء اللہ نے کہا کہ پاکستان نہ صرف اپنے عوام کے تحفظ کا خواہاں ہے بلکہ بھارتی عوام کے لیے بھی خیرسگالی کے جذبات رکھتا ہے۔ انہوں نے کہا کہ اگرچہ خوشحالی ابھی پوری طرح نہیں آئی لیکن پاکستان درست سمت میں گامزن ہے اور یہ ملک ان شاءاللہ کامیاب ہو کر آگے بڑھے گا۔