Live Updates

وزیرِمملکت برائے داخلہ طلال چوہدری سے سعودی عرب کے ڈائریکٹر جنرل اینٹی نارکوٹکس میجر جنرل محمد بن سعید القرنی کی وفد کے ہمراہ ملاقات

منگل 6 مئی 2025 23:40

اسلام آباد (اُردو پوائنٹ اخبارتازہ ترین - اے پی پی۔ 06 مئی2025ء) وزیرِ مملکت برائے داخلہ طلال چوہدری سے سعودی عرب کے ڈائریکٹر جنرل اینٹی نارکوٹکس میجر جنرل محمد بن سعید القرنی نے وفد کے ہمراہ ملاقات کی جس میں انسداد منشیات کے ضمن میں دوطرفہ تعاون بڑھانے پر اتفاق کیا گیا۔ وزیر مملکت طلال چوہدری نے کہا کہ اینٹی نارکوٹکس کے حوالے سے پاکستان کی زیرو ٹالرنس پالیسی ہے، منشیات کی سمگلنگ ایک بین الاقوامی مسئلہ ہے، دوست ممالک کے مابین باہمی اشتراک سے ہی اس ناسور پر قابو پایا جا سکتا ہے، اینٹی نارکوٹکس فورس محدود وسائل کے باوجود شاندار کارکردگی کا مظاہرہ کر رہی ہے۔

وزیر مملکت نے کہا کہ گزشتہ سال 21 بلین ڈالر مالیت کی منشیات ضبط کی گئیں،دنیا کی 40 فیصد سے زائد منشیات کی پیداوار افغانستان میں ہوتی ہے، پاکستان میں غیر قانونی طور پر مقیم افراد کے خلاف کارروائی کی بنیادی وجہ منشیات اور دہشت گردی جیسے سنگین مسائل ہیں۔

(جاری ہے)

میجر جنرل محمد بن سعید القرنی کہا کہ پاکستان کے ساتھ ہر شعبے میں مثالی اور برادرانہ تعلقات ہیں، منشیات کی لعنت کے مؤثر انداز میں سدباب کیلئے مل کر کام کرنا ہو گا۔

وفد میں سعودی عرب کے سفیر نواف بن سعید المالکی، میجر جنرل ترکی بن عبد العزیز، بریگیڈیئر راجی بن مسلم، لیفٹیننٹ نواف بن محمد الہنکی، فواز بن خالد اور کرنل سعید محمد شامل تھے۔وفاقی سیکرٹری داخلہ محمد خرم آغا، ایڈیشنل سیکرٹری داخلہ اور اینٹی نارکوٹکس فورس کے سینئر افسران بھی اس موقع پر موجود تھے۔طلال چوہدری نے وفاقی وزیر داخلہ محسن نقوی کی جانب سے وفد کو اعزازی شیلڈز پیش کیں اور ان کے لئے نیک خواہشات کا پیغام بھی پہنچایا۔