Live Updates

بھارتی جارحیت اقوام متحدہ کے چارٹر، بین الاقوامی قوانین کے مسلمہ اصولوں کی صریح خلاف ورزی ہے،ترجمان دفتر خارجہ

بھارت کی غیر ذمہ دارانہ کارروائی نے دو ایٹمی ریاستوں کو تصادم کے دہانے پر لا کھڑا کیا ہے،بھارت نے پاکستان کی خودمختاری کی سنگین خلاف ورزی کی ہے،شفقت علی خان

فیصل علوی بدھ 7 مئی 2025 11:55

بھارتی جارحیت اقوام متحدہ کے چارٹر، بین الاقوامی قوانین کے مسلمہ اصولوں ..

اسلام آباد(اردوپوائنٹ اخبار تازہ ترین۔07 مئی 2025)دفتر خارجہ کے ترجمان شفقت علی خان نے کہا ہے کہ پاکستان بھارت کی اس بزدلانہ کارروائی کی شدید مذمت کرتا ہے، بھارتی جارحیت اقوام متحدہ کے چارٹر، بین الاقوامی قوانین اور بین الریاستی تعلقات کے مسلمہ اصولوں کی صریح خلاف ورزی ہے،اپنے ایک بیان میں ترجمان دفتر خارجہ کا کہنا ہے کہ بھارت کی غیر ذمہ دارانہ کارروائی نے دو ایٹمی ریاستوں کو تصادم کے دہانے پر لا کھڑا کیا ہے۔

بھارت کی جانب سے حملے بین الاقوامی سرحد کے پار مریدکے، بہاولپور اور لائن آف کنٹرول (ایل او سی) کے پار کوٹلی اور مظفرآباد (آزاد جموں و کشمیر) میں کئے گئے ہیں ان حملوں کا نشانہ عام شہری بنے ہیں۔ انہوں نے کہا کہ بھارتی جارحیت کے نتیجے میں خواتین اور بچوں سمیت بے گناہ شہری شہید ہوئے ہیں اس حملے سے تجارتی فضائی پروازوں کو بھی شدید خطرات لاحق ہوئے ہیں۔

(جاری ہے)

پہلگام حملے کے تناظر میں بھارتی قیادت نے ایک بار پھر دہشت گردی کا بہانہ بنا کر جھوٹا بیانیہ اپنایا ہے تاکہ خطے کے امن و سلامتی کو داﺅ پر لگایا جا سکے۔پاکستان کی جانب سے بھارت کی کھلی جارحیت کی سخت مذمت کی اور کہا کہ بھارتی فضائیہ نے بلااشتعال اور کھلی جنگی کارروائی کے تحت اپنی فضائی حدود میں رہتے ہوئے سٹینڈ آف ہتھیاروں کے ذریعے پاکستان کی خودمختاری کی سنگین خلاف ورزی کی ہے۔

حکومت پاکستان، مسلح افواج اور عوام بھارتی جارحیت کے خلاف متحد ہیں وہ ہمیشہ پاکستان کی خودمختاری اور علاقائی سالمیت کے تحفظ اور بقا کیلئے فولادی عزم کے ساتھ عمل کریں گے۔ترجمان دفتر خارجہ شفقت علی خان کامزید کہنا تھا کہ پاکستان اقوام متحدہ کے چارٹر کے آرٹیکل 51 اور بین الاقوامی قانون کے مطابق مناسب وقت اور مقام پر جواب دینے کا حق محفوظ رکھتا ہے۔

خیال رہے کہ اس سے قبل پاکستان نے بھارت کی جانب سے بزدلانہ حملے پر بھارتی ناظم الامور کو دفتر خارجہ طلب کر کے شدید احتجاج ریکارڈ کروایا تھا۔ترجمان دفتر خارجہ کے مطابق بھارتی ناظم الامور کو بتایا گیا کہ حملہ نہ صرف بین الاقوامی قوانین کی کھلی خلاف ورزی تھی بلکہ یہ خطے کے امن و استحکام کیلئے ایک سنگین خطرہ بھی تھا۔ترجمان دفترخارجہ کے مطابق بھارت نے پاکستان کی خود مختاری کی صریحاً خلاف ورزی کی، پاکستان نے بھارتی حملوں پرشدید احتجاج ریکارڈ کرایاتھا۔ترجمان کے مطابق بھارت نے پاکستان اور آزاد کشمیر میں بلااشتعال حملے کئے۔ بھارت کو خبردار کیا ہے کہ ایسی مہم جوئی خطے کے امن کیلئے خطرہ تھی۔