Live Updates

پاکستان بھارتی حملے کا جواب اپنی مرضی کے مقام اور طریقے سے دیگا،بلاول بھٹو زرداری

بدھ 7 مئی 2025 20:44

کراچی(اُردو پوائنٹ اخبارتازہ ترین - این این آئی۔ 07 مئی2025ء)پاکستان پیپلز پارٹی کے چیئرمین بلاول بھٹو زرداری نے کہاہے کہ پاکستان جواب دینے کا حق رکھتا ہے، پاکستان بھارتی حملے کا جواب اپنی مرضی کے مقام اور طریقے سے دے گا۔غیرملکی میڈیا سے گفتگومیں چیئرمین پیپلز پارٹی بلاول بھٹو زرداری نے کہا کہ بھارتی حملے میں شہید ہونے والوں کے اہلِ خانہ سے تعزیت کرتا ہوں، یہ بھارت کی جانب سے بلا اشتعال، جان بوجھ کر جنگی اقدام ہے۔

انہوں نے کہاکہ پاکستان کو گزشتہ دو ہفتوں سے بھارتی حکومت کی دھمکیوں کا سامنا رہا، پاکستان نے بھارتی الزامات کیجواب میں غیر جانبدار تحقیقات کا مطالبہ کیا، بھارت نے پاکستان کی تحقیقات کی پیش کش ٹھکرا کر شہریوں کو نشانہ بنایا۔بلاول بھٹونے کہاکہ بھارتی الزامات میں حقیقت ہوتی تو تحقیقات کی پیش کش قبول کرتا، پاکستان یو این کے چارٹر کے تحت جواب دینے کا حق رکھتا ہے، پاکستانی افواج نے بر وقت اور بہادری سے بھارتی جارحیت کا جواب دیا۔

(جاری ہے)

انہوں نے مزید کہا کہ ہم نے اپنے دفاع میں بھارت کے 5 طیارے مار گرائے، بھارت نے پاکستانی حدود میں ڈیم اور دیگر شہری تعمیرات پر حملے کئے، الزام میں سچائی ہوتی تو بھارت پاکستان کی غیر جانبدار تحقیقات کی پیشکش کو کیوں مسترد کرتا چیئرمین پیپلز پارٹی نے یہ بھی کہا ہے کہ بھارت نے ان بین الاقوامی صحافیوں کا انتظار کیوں نہیں کیا جو پہلے ہی ان مقامات کا دورہ کر رہے تھی اصل حقیقت یہ ہے کہ بھارت نے یہ جھوٹ گھڑا ہے تاکہ بھارتی شہریوں کی توجہ ہٹائی جا سکے۔