Live Updates

پاک سر زمین کے دفاع پر پوری قوم افواج پاکستان کے ساتھ سیسہ پلائی دیوار بن گئی‘ ہشام الٰہی ظہیر

صدر جمعیت اہلحدیث پاکستان سے جے یو آئی (ف) کے حافظ نصیر احمد احرار کی وفد کے ہمراہ ملاقات

اتوار 11 مئی 2025 14:30

لاہور(اُردو پوائنٹ اخبارتازہ ترین - این این آئی۔ 11 مئی2025ء)جمعیت اہلحدیث پاکستان کے صدر ڈاکٹر علامہ ہشام الٰہی ظہیر سے جمعیت علما ئے اسلام (ف) پنجاب جنرل سیکرٹری حافظ نصیر احمد احرار نے وفد کے ہمراہ مرکزی دفتر میں ملاقات کی۔ملاقات میں ملکی سیاسی اور خاص طور پر پاک بھارت کشیدہ صورتحال سمیت دیگر ایشوز پر بات چیت کی گئی۔اس موقع پر گفتگو کرتے ہوئے علامہ ہشام الٰہی ظہیر نے کہاکہ آپریشن ’’بنیان مرصوص‘‘میں بھارت کے خلاف تاریخی کامیابی اللہ کے فضل اور پوری قوم کی پاک فوج کے ساتھ یکجہتی کا نتیجہ ہے ،ہم اس شاندار فتح پر افواج پاکستان کو خراج تحسین پیش کرتے ہیں۔

جب اور جس محاذ پربھی ضرورت پڑی ہم پاک فوج کے ساتھ کھڑے رہیں گے۔انہوں نے کہا کہ پاک سر زمین کے دفاع پر پوری قوم افواج پاکستان کے ساتھ سیسہ پلائی دیوار بن گئی ،نتیجے میںاللہ رب العزت نے ہمیں بڑی کامیابی و فتح سے ہمکنار کر دیا ۔

(جاری ہے)

پاکستان کی فتح پوری پاک فوج اور قوم کی فتح ہے جس پر ہم سب اللہ تعالی کا شکر بجا لاتے ہیں۔ہمارا تن من دھن اس پاک سر زمین کے لئے قربان ہے۔

علامہ ہشام الٰہی ظہیر نے مزیدکہاکہ پاکستان ایک نظریہ ایک عقیدہ اور مضبوط دفاعی دیوار کا نام ہے ،اگر بھارت نے دوبارہ پاکستان پر حملہ کرنے کا سوچا تو اس کو نشان عبرت بنادیا جائے گا۔ہم پاکستان کی طرف میلی آنکھ سے دیکھنے والے کی آنکھیں نکال دیںگے۔ انہوں نے عالمی برادری سمیت پاکستانی قوم کو اپنے پیغام میں کہا کہ فلسطین بیت المقدس کی آزادی اور اس کو اسرائیل کے چنگل سے آزاد کروانے کے لئے بھی کام کرنے کی ضرورت ہے،اس پر بھی یہی اتحاد اور جذبے کی ضرورت ہے۔

حافظ نصیر احمدنے گفتگو کرتے ہوئے کہا کہ قائد جمعیت مولانا فضل الرحمن کی ہدایت پر ملک بھر میں بھارتی جارحیت اور افواج پاکستان کے ساتھ اظہار یکجہتی کی قرار دادیں منظور کی جا رہی ہیں۔ ہم وطن کے استحکام اور اسلامی تشخص کے تحفظ کیلئے ہر سطح پر یکجہتی کا مظاہرہ کریں گے۔