Live Updates

جنگ بندی کے بعد وسیم اکرم کا ٹوئٹ، کرکٹ حلقوں اور عوام نے آڑے ہاتھوں لے لیا

انہوں نے سوشل میڈیا پلیٹ فارم کے ذریعے افواجِ پاکستان کے ساتھ اظہارِ یکجہتی کیا تھا

اتوار 11 مئی 2025 19:30

کراچی(اُردو پوائنٹ اخبارتازہ ترین - این این آئی۔ 11 مئی2025ء)سابق کپتان وسیم اکرم کو پاک بھارت کشیدگی کے دوران تاخیر سے پاک فوج کے حق میں بیان جاری کرنے پر تنقید کا سامنا ہے۔انہوں نے سوشل میڈیا پلیٹ فارم ایکس(سابقہ ٹوئٹر)پر جنگ بندی کے باقاعدہ اعلان کے بعد ایک ٹوئٹ کے ذریعے افواجِ پاکستان کے ساتھ اظہارِ یکجہتی کیا، جس پر انہیں شائقین اور سابق کھلاڑیوں کی جانب سے سخت ردعمل کا سامنا کرنا پڑا۔

وسیم اکرم نے اپنے پیغام میں کہاکہ ہم سب اپنی مسلح افواج کے ساتھ کھڑے ہیں، جنہوں نے دشمن کی جارحیت کا بھرپور جواب دیا۔ جیسا کہ کہا جاتا ہے، جنگ تب ہوتی ہے جب بات چیت ناکام ہو جائے۔ سرحد پار نوجوانوں کے بہتر مستقبل کے لیے مذاکرات ضروری ہیں، کیوں کہ آخرکار امن ہی سب کی خواہش ہے۔

(جاری ہے)

پاکستان زندہ باد!تاہم ان کے اس بیان پر کئی سوشل میڈیا صارفین اور سابق کھلاڑی ناراض نظر آئے، کیونکہ یہ پیغام اس وقت آیا جب جنگ بندی کا اعلان پہلے ہی کیا جا چکا تھا۔

سابق ٹیسٹ کرکٹر باسط علی نے سخت موقف اپناتے ہوئے کہاکہ ایسے نازک وقت میں خاموشی اختیار کرنا اور حالات بہتر ہونے پر بیان دینا کہاں کی ہمت ہی کرکٹرز کو قوم کے دکھ درد میں بروقت آواز بلند کرنی چاہیے، نہ کہ حالات تھم جانے کے بعد!سوشل میڈیا پر بھی صارفین نے وسیم اکرم کو غیر سنجیدہ اور تاخیر سے جاگنے والا قرار دیا، جبکہ بعض صارفین نے ان سے مطالبہ کیا کہ وہ مشکل وقت میں قوم کے ساتھ کھڑے ہونے کا عملی مظاہرہ کریں۔یاد رہے، اس سے قبل پاکستانی کھلاڑیوں جیسے شاہین شاہ آفریدی اور فخر زمان نے کھل کر بھارتی جارحیت پر جواب دیا تھا اور قومی اتحاد کا پیغام دیا، جس پر عوام نے انہیں سراہا۔