خواتین کو بااختیار بنانا ملک کی جی ڈی پی کو نمایاں طور پر بڑھا سکتا ہے ، رانا مشہود احمد خان

اسلام آباد (اُردو پوائنٹ اخبارتازہ ترین - اے پی پی۔ 14 مئی2025ء) چیئرمین وزیراعظم یوتھ پروگرام رانا مشہود احمد خان نے کہا ہے کہ خواتین کو بااختیار بنانا کسی بھی ملک کی جی ڈی پی کو نمایاں طور پر بڑھا سکتا ہے کیونکہ وہ ایک ترقی پسند معیشت کی ریڑھ کی ہڈی ہیں، وزیر اعظم کے یوتھ پروگرام کے ذریعے ہم صرف فنڈ فراہم کرنے سے زیادہ کام کر رہے ہیں ، ہم ایک ایسا ماحولیاتی نظام بنانے کا ارادہ رکھتے ہیں جس کے ذریعے خواتین ترقی کر سکیں اور آگے بڑھ سکیں۔

بدھ کو وزیراعظم یوتھ پروگرام سے جاری بیان کے مطابق راولپنڈی ویمن چیمبر آف کامرس اینڈ انڈسٹری اور چیئرمین وزیراعظم یوتھ پروگرام رانا مشہود احمد خان کے درمیان وزیراعظم یوتھ بزنس وزرعی قرضہ سکیم کے تحت خواتین کے ملکیتی کاروبار کے لئے نئے راستے کھولنے کے حوالے سے ایک اہم اجلاس منعقد ہوا۔

(جاری ہے)

چیئرمین وزیراعظم یوتھ پروگرام نے وفد کو قرضہ سکیم کے تحت خواتین کیلئے مخصوص 25 فیصد کوٹہ اور راولپنڈی ویمن چیمبر میں قرض سہولت مرکز قائم کرنے کے بارے میں بتایا، یہ مرکز کاروباری خواتین کو ایک چھت تلے تمام سہولیات فراہم کرے گا جو اس سکیم کے تحت قرض کے مواقع کو حاصل کرنے کے لئے متعلقہ مدد تک رسائی کو آسان بنائے گا۔

اجلاس میں نوجوان خواتین کے لئے باضابطہ رہنمائی کے سیشنز اور صلاحیت سازی کے اختیارات کے ساتھ ساتھ راولپنڈی ویمن چیمبر آف کامرس اینڈ انڈسٹری کی اراکین اور خطے کے دیگر چیمبرز کی خواتین کے لئے بیداری اور کاروباری تربیتی سیشنز کے بارے میں بھی تبادلہ خیال کیا گیا۔ مزید برآں خواتین کے لئے روزگار کے مواقع اور خواتین کی ملکیتی کاروبار کو جوڑنے کے لئے سپورٹ نیٹ ورکس کے قیام، خواتین کی ملکیت والے کاروبار کو بڑھانے میں مدد کرنے پر بات چیت کی گئی۔

وزیراعظم یوتھ پروگرام کی ٹیم نے معاشی ترقی کو فروغ دینے کے اپنے عزم کا اعادہ کیا جس میں خواتین بھی شامل ہیں تاکہ وہ پاکستان کی ترقی میں بھرپور حصہ ڈال سکیں۔ چیئرمین وزیراعظم یوتھ پروگرام رانا مشہود احمد خان نے کہا کہ خواتین کو بااختیار بنانا کسی ملک کی جی ڈی پی کو نمایاں طور پر بڑھا سکتا ہے کیونکہ وہ ایک ترقی پسند معیشت کی ریڑھ کی ہڈی ہیں، وزیر اعظم کے یوتھ پروگرام کے ذریعے ہم صرف فنڈ فراہم کرنے سے زیادہ کام کر رہے ہیں ، ہم ایک ایسا ماحولیاتی نظام بنانے کا ارادہ رکھتے ہیں جس کے ذریعے خواتین ترقی کر سکیں اور آگے بڑھ سکیں۔

یہ اجلاس انٹرپرینیورشپ میں صنفی فرق کو ختم کرنے کے لئے ایک اہم قدم تھا اور وزیراعظم یوتھ پروگرام کے اس عزم کو ظاہر کرتا ہے کہ ہم قومی ترقی کو آگے بڑھاتے ہوئے کسی کو پیچھے نہیں چھوڑیں گے۔