Live Updates

ملک بھر میں شدید گرمی کی لہر، پنجاب میں درجہ حرارت معمول سے 6 ڈگری تک زیادہ رہنے کا امکان

دھوپ میں غیر ضروری باہر نکلنے سے گریز کریں، پانی کا زیادہ استعمال کریں اور بزرگوں، بچوں اور بیمار افراد کو خاص طور پر گرمی سے بچاؤ کے اقدامات فراہم کیے جائیں؛ شہریوں کیلئے ہدایات جاری

ساجد علی جمعرات 15 مئی 2025 11:12

ملک بھر میں شدید گرمی کی لہر، پنجاب میں درجہ حرارت معمول سے 6 ڈگری تک ..

لاہور ( اُردو پوائنٹ اخبارتازہ ترین۔ 15 مئی2025ء ) ملک بھر میں شدید گرمی کی لہر جاری ہے اس دوران پنجاب میں درجہ حرارت معمول سے 6 ڈگری تک زیادہ رہنے کا امکان ہے۔ تفصیلات کے مطابق محکمہ موسمیات نے ملک کے بیشتر علاقوں میں موسم خشک اور شدید گرم رہنے کی پیش گوئی کی ہے، جس کی وجہ سے پنجاب، سندھ، بلوچستان اور خیبرپختونخواہ کے میدانی علاقوں میں درجہ حرارت معمول سے 4 سے 6 ڈگری سینٹی گریڈ تک زیادہ رہنے کا امکان ہے، اسلام آباد اور گردونواح میں بھی موسم گرم اور خشک رہنے کی پیش گوئی کی گئی ہے۔

محکمہ موسمیات نے کہا ہے کہ پنجاب کے بیشتر شہروں میں درجہ حرارت میں واضح اضافہ متوقع ہے، سندھ اور بلوچستان کے میدانی علاقوں میں شدید گرمی کی شدت محسوس کی جائے گی، خیبرپختونخواہ، آزاد کشمیر اور گلگت بلتستان میں بھی درجہ حرارت میں اضافہ ریکارڈ ہونے کا امکان ہے، شہریوں کو شدید گرمی کے پیش نظر احتیاطی تدابیر اختیار کرنے کی ہدایت کرتے ہوئے کہا گیا ہے کہ دھوپ میں غیر ضروری باہر نکلنے سے گریز کریں، پانی کا زیادہ استعمال کریں اور بزرگوں، بچوں اور بیمار افراد کو خاص طور پر گرمی سے بچاؤ کے اقدامات فراہم کیے جائیں۔

(جاری ہے)

ادھر ہیٹ ویو الرٹ جاری کرتے ہوئے ڈی جی پی ڈی ایم اے پنجاب نے صوبے بھر کے کمشنرز اور ڈپٹی کمشنرز کو حفاظتی انتظامات کی ہدایت کی ہے، انہوں نے متعلقہ محکموں یعنی سکول ایجوکیشن، ہیلتھ، ٹرانسپورٹ، لوکل گورنمنٹ اور ریسکیو 1122 کو صورتحال کے پیش نظر الرٹ رہنے کی ہدایت کی، ڈی جی نے کہا کہ 19 مئی اور 20 مئی کو پنجاب کے بڑے علاقوں میں 19 مئی کی شام کو مغربی لہر کے داخل ہونے کے بعد بارش کے بعد موسم خوشگوار ہو جائے گا۔

دوسری طرف صوبہ پنجاب کے سکولوں کیلئے موسم گرما کی تعطیلات کا شیڈول بھی جاری کردیا گیا ہے، گرمی کی شدت میں غیر معمولی اضافہ ہونے کی صورت میں سکولوں میں قبل از وقت تعطیلات دے دی جائیں گی، محکمہ سکولز ایجوکیشن پنجاب نے موسم گرما کی تعطیلات کا شیڈول جاری کیا، جاری کردہ شیڈول سے معلوم ہوا ہے کہ پنجاب میں سکول یکم جون سے 9 اگست 2025 تک بند رہیں گے، گرمی بڑھنے کی صورت میں ایک ہفتہ قبل چھٹیاں ہونے کا بھی امکان موجود ہے۔