Live Updates

مرکزی علماکونسل اور انٹرنیشنل ختم نبوت موومنٹ پاکستان کے زیر اہتمام فیصل آباد سمیت ملک بھر میں یوم تشکر منایا گیا

جمعہ 16 مئی 2025 17:51

فیصل آباد (اُردو پوائنٹ اخبارتازہ ترین - اے پی پی۔ 16 مئی2025ء) مرکزی علماکونسل اور انٹرنیشنل ختم نبوت موومنٹ پاکستان کے زیر اہتمام ملک بھر میں یوم تشکر منایا گیا۔ ترجمان میڈیا سیل محمد عبداللہ کے مطابق چیئرمین مرکزی علماکونسل و جنرل سیکرٹری انٹرنیشنل ختم نبوت موومنٹ پاکستان صاحبزادہ مولانا زاہد محمود قاسمی نے مرکزی جامع مسجد گول میں جمعہ کے اجتماع سے خطاب کرتے ہوئے کہا کہ ہماری بہادر افواج نے فجر کے وقت آپریشن’’ بنیان مرصوص ‘‘کا آغاز کرکے دشمن کو منہ توڑ جواب دیا ہے۔

جدید حکمت عملی، بہادر قیادت اور جذبہ شہادت سے لبریز ہماری پاک فضائیہ اور آرمی خراج تحسین کی مستحق ہے۔ آج اقوام عالم میں پاکستان کی افواج کا نام سرفہرست ہے اور پاک فوج کو دنیا کی بہترین افواج میں تصور کیا جارہا ہے۔

(جاری ہے)

شہدا ءکے خون کی برکت اور ایمان کی طاقت سے شاندار فتح اور کامیابی پر آج ہم یوم تشکر اور معرکہ حق منا رہے ہیں۔ یوم تشکر کے موقع پر تمام شہداکو خراج تحسین پیش کرتے ہیں۔

شہید زندہ ہیں اور ہمارے شہدا ہمارا فخر ہیں۔اس جنگ میں پاکستان میں موجود مسیحی برادری اور دیگر اقلیتوں نے بھی پاکستان کا بھر پور ساتھ دیا ہے۔ مساجد، مدارس، بے گناہ شہریوں کی شہادت کا بدلہ پاکستان کی افواج نے بھارت سے لے لیا ہے۔اس پر ہم سجدۂ شکر ادا کرتے ہیں۔ پاکستان میں موجود مساجد، مدارس اور علما و مشائخ نے دشمن کی شکست اور پاکستان کیلئے دعاؤں کا اہتمام صبح و شام جاری رکھا۔آج بھی پوری قوم متحد ہیں۔ آپریشن’’ بنیان مرصوص‘‘ افواج پاکستان کی شاندار کامیابی ہے۔ ’’معرکہ حق ‘‘پاکستان کی تاریخ کا وہ روشن باب ہے، جسے رہتی دنیا تک یاد رکھا جائے گا۔افواج پاکستان نے اپنے عزم، حوصلے، قربانی سے دشمن کے ناپاک عزائم خاک میں ملا دئیے ہیں۔