پاکستان پولیس کی خاتون افسر نے ورلڈ پولیس سمٹ کا بین الاقوامی ایوارڈ جیت لیا

انعم خان محمد شیر نے دبئی میں ورلڈ پولیس سمٹ ایوارڈز 2025 میں ” ایکسلینس ان کرمنل انویسٹی گیشن “ کا عالمی ایوارڈ جیتا، انعم خان کو یہ اعزاز پنجاب کے دو اہم قتل کیسز کو کامیابی سے حل کرنے پر دیا گیا

فیصل علوی ہفتہ 17 مئی 2025 13:00

پاکستان پولیس کی خاتون افسر نے ورلڈ پولیس سمٹ کا بین الاقوامی ایوارڈ ..

لاہور(اردوپوائنٹ اخبار تازہ ترین۔17 مئی 2025)پنجاب پولیس کی خاتون پولیس افسر نے ورلڈ پولیس سمٹ کا بین الاقوامی ایوارڈ جیت لیا، پاکستانی پولیس افسر انعم خان محمد شیر نے دبئی میں ورلڈ پولیس سمٹ ایوارڈز 2025 میں ” ایکسلینس اِن کرمنل انویسٹی گیشن “ کا عالمی ایوارڈ جیت لیا، پاکستان پولیس نے بین الاقوامی سطح پر ایک شاندار اعزاز حاصل کر لیا، پاکستان کے صوبہ پنجاب کے شہر سرگودھا کی پولیس افسر انعم خان نے دبئی میں عالمی انویسٹی گیشن ایوارڈ جیت لیا،یہ ایوارڈ خاتون پولیس افسراے ایس پی انعم شیر خان کو دبئی میں واقع ورلڈ ٹریڈ سینٹر میں ہونے والی ایک پر وقار تقریب میں دبئی پولیس کے کمانڈر ان چیف نے دیا۔

انعم خان کو یہ اعزاز پنجاب کے دو اہم قتل کیسز کو کامیابی سے حل کرنے پر دیا گیا۔

(جاری ہے)

ترجمان پنجاب پولیس کے مطابق اے ا یس پی انعم شیر خان نے تفتیشی عمل میں بہترین کردگی پر پہلی پوزیشن لی تھی۔یہ ایوارڈ ان کی کریمینل انویسٹی گیشن کے شعبے میں شاندار خدمات کا اعتراف ہے۔خاتون پولیس افسر نے پاکستان کی نمائندگی کرتے ہوئے اپنی قابلیت اور پیشہ ورانہ مہارت سے عالمی ججز کا اعتماد حاصل کیا اور پہلی پوزیشن حاصل کی۔

اس ایوارڈ کیلئے دنیا کے 192 ممالک سے پولیس افسران کی مختلف کیٹیگریز میں غیر معمولی کارکردگی زیر غور آئی۔یہ ایوارڈ دبئی پولیس کی میزبانی میں ایک شاندار تقریب کے دوران پیش کیا گیا، جس میں دنیا کے 90 سے زائد ممالک سے پولیس سربراہان اور سیکیورٹی ماہرین نے شرکت کی۔انعم خان پاکستان کے صوبہ پنجاب کے شہر سرگودھا میں بطور تحقیقاتی آفیسر خدمات انجام دے رہی ہیں۔

دوسری جانب آئی جی پنجاب ڈاکٹر عثمان انور نے ا ے ایس پی انعم شیر خان کو اس شاندار کامیابی پر مبارکباد اور شاباش دیتے ہوئے کہا کہ ان کی کامیابی پاکستان اور پنجاب پولیس کا نام دنیا بھر میں روشن کرنے کا باعث بنی ہے۔یاد رہے کہ اس سے قبل پنجاب پولیس کے 2 افسروں کی قابلیت کا بین الاقوامی سطح پر اعتراف کیا گیاتھا اور انکے نام عالمی اعزازات کیلئے منتخب کر لئے گئے تھے۔ ورلڈ پولیس سمٹ نے ایس ڈی پی او سٹی سرکل سرگودھا اے ایس پی انعم شیر خان کو بین الاقوامی ایوارڈز کیٹیگریز میں اول اور ڈی پی او قصور محمد عیسی خان کو سیکنڈ پوزیشن کیلئے منتخب کیا گیا تھا۔