Live Updates

بھارت جاسوسی کا الزام لگاکریوٹیوبرز، سوشل میڈیا ایکٹوسٹس کو نشانہ بنانے لگا

پانی پت میں ایک 24سالہ سیکیورٹی گارڈ نعمان الہی کو مبینہ طور پر پاکستان کو معلومات فراہم کرنے کے الزام میں گرفتارکیاگیا

اتوار 18 مئی 2025 13:05

نئی دہلی(اُردو پوائنٹ اخبارتازہ ترین - این این آئی۔ 18 مئی2025ء)مودی کی زیرقیادت بھارتی حکومت نے ان یوٹیوبرز اور سوشل میڈیا ایکٹوسٹس کو نشانہ بنانا شروع کر دیا ہے جنہوں نے پاکستان کے ساتھ محاذآرائی سے گریز کرنے اور معاملات کو سفارتی ذرائع سے حل کرنے پر زور دیا تھا۔کشمیر میڈیا سروس کے مطابق کم از کم ایسے پانچ افراد کوخاص طور پر پاکستان کا دورہ کرنے والے لوگوں کو نظر بندی، نگرانی، ہراسانی اور آن لائن دھمکیوں کا سامنا ہے۔

ان کا واحد جرم یہ ہے کہ وہ بی جے پی حکومت پر زور دیتے رہے کہ وہ مزید دشمنی کو ہوا دینے کے بجائے عقل کا استعمال کرے۔33سالہ جیوتی ملہوترا ان متاثرین میں شامل ہیں۔ وہ ایک ٹریول بلاگر ہے جو یوٹیوب چینل’’ ٹریول ود جو ‘‘چلاتی تھی، اسے پاکستان کے لیے جاسوسی کے مضحکہ خیز الزام پر ہریانہ کے علاقے حصار سے گرفتار کیا گیا ہے۔

(جاری ہے)

حکام کا کہنا ہے کہ جیوتی ملہوترا نے پاکستانی انٹیلی جنس حکام کے ساتھ حساس فوجی معلومات شیئر کیں اوروہ پاکستانی ہائی کمیشن سے منسلک افراد کے ساتھ مسلسل رابطے میں تھیں۔

پولیس کا کہنا ہے کہ جیوتی ملہوترا نے 2023 میں دہلی میں ایک سفارت کار احسان الرحیم سے ملاقات کے بعد کم از کم دو بار پاکستان کا دورہ کیا۔ ان پر بھارت کی خودمختاری کو خطرے میں ڈالنے کا الزام عائد کیا گیا ہے اور انہیں پانچ دن کے ریمانڈ پر پولیس کی تحویل میں دیا گیا ہے۔میڈیا رپورٹس کے مطابق گزشتہ ہفتے کے دوران اسی طرح کے مقدمات میں چار دیگر افراد کوگرفتارکیاگیا ہے۔

پانی پت میں ایک 24سالہ سیکیورٹی گارڈ نعمان الہی کو مبینہ طور پر پاکستان کو معلومات فراہم کرنے کے الزام میں گرفتارکیاگیا۔ کیتھل میں ایک 25سالہ پوسٹ گریجویٹ طالب علم دیویندر سنگھ ڈھلون کو کرتار پور راہداری کے دورے کے بعد پاکستان کی آئی ایس آئی کے ساتھ مبینہ طور پر فوج سے متعلق مواد شیئر کرنے کے الزام میں گرفتار کیا گیا۔اس سے قبل پنجاب پولیس نے دو مزید افراد کو اسی طرح کے الزامات میں گرفتار کیا تھا۔مبصرین نے گرفتار شدگان کے خلاف الزامات کو بے بنیاد قرار دیتے ہوئے مسترد کردیااور ان گرفتاریوں کو پاکستان کے خلاف آپریشن سندورمیں ذلت آمیز شکست کے بعد مودی حکومت کی بوکھلاہٹ قرار دیا ہے۔