محکمہ آبپاشی کی جانب سے حیدرآباد میں یوم تشکر منایا گیا،مسلح افواج کو مادروطن کے دفاع پرخراج تحسین پیش

کراچی(اُردو پوائنٹ اخبارتازہ ترین - این این آئی۔ 18 مئی2025ء)حکومت سندھ کے محکمہ آبپاشی کی جانب سے اتوارکوحیدرآباد میں یوم تشکر منایا گیا۔ اس سلسلے میں سندھ اریگیشن اینڈ ڈرینیج اتھارٹی(سیڈا)کے دفتر میں ایک پروقار تقریب منعقد ہوئی، جس میں صوبائی وزیر آبپاشی جام خان شورو نے خصوصی طور پر شرکت کی۔تقریب میں صوبائی سیکریٹری آبپاشی ظریف اقبال کھیڑو، میئر حیدرآباد کاشف شورو، رکن سندھ اسمبلی صائمہ آغا، ایم ڈی سیڈا پریتم داس و دیگر نے شرکت کی۔

وزیر آبپاشی جام خان شورو نے تقریب کے آغاز پر کیک کاٹا اور پاک افواج کی کامیابیوں پر مسرت کا اظہار کیا۔ اس موقع پر آتش بازی کا بھی مظاہرہ کیا گیا۔تقریب سے خطاب کرتے ہوئے صوبائی وزیر جام خان شورو نے افواج پاکستان کو سلام پیش کیا اور کہا کہ قوم کو اپنی بہادر افواج کی جرات پر فخر ہے۔

(جاری ہے)

انہوں نے واضح کیا کہ جنگ کسی بھی مہذب معاشرے کے لیے قابل قبول نہیں ہے۔

انہوں نے پیپلز پارٹی اور شہید ذوالفقار علی بھٹو کے دور میں پاکستان کی جانب سے بھارت کے بعد ایٹمی ٹیکنالوجی حاصل کرنے کی کوششوں کا ذکر کیا.وزیر آبپاشی نے بھارت کے حالیہ رویے پر سخت تنقید کرتے ہوئے کہا کہ پہلگام میں دہشت گردی کے واقع کے چند گھنٹوں کے اندر ہی بھارت نے پاکستان پر الزام عائد کر دیا۔ انہوں نے یاد دلایا کہ 23 اپریل کو بھارت نے انڈس واٹر ٹریٹی کی خلاف ورزی کرتے ہوئے پانی روک دیا اور فضائی حدود بھی بند کر دیں ۔

پاکستان نے تو پہلگام واقع کی کسی بھی تیسری قوت سے تحقیقات کرانے کی پیشکش بھی کی تھی۔جام خان شورو نے مزید کہا کہ پاکستان نے کلبھوشن یادیو کو گرفتار کر کے جیل میں بند کیا اورحملے کے باوجود بھی گرفتار بھارتی پائلٹ ابھی نندن کو چائے پلا کر واپس بھیجا. پاکستان نے پہلگام دہشت گردی واقعے کی مذمت کی، لیکن اس کے برعکس بھارت نے 7 مئی کو پاکستان کے شہریوں پر حملہ کر دیا۔

انہوں نے کہا کہ بھارت نے تو حد ہی کر دی تھی، چند گھنٹوں کے اندر پاکستان پر جھوٹے حملے کا الزام لگایا اور فوری طور پر پاکستان کا پانی بند کر کے آبی دہشت گردی کا ارتکاب کیا۔ تاہم، ہماری پاک افواج، بحریہ اور ایئر فورس نے قوم کی مدد سے بھارت کو بھرپور جواب دیا، جس کے تین گھنٹے بعد بھارت نے سیز فائر کا اعلان کر دیا۔وزیر آبپاشی نے بھارتی میڈیا اور سول سوسائٹی پر حیرت کا اظہار کیا کہ وہ بے گناہ شہریوں پر حملے پر خوشی کا اظہار کر رہے تھے۔

انہوں نے کہا کہ افواج پاکستان نے بھارت کا رافیل طیارہ بھی مار گرایا۔ جنگ کسی مسئلے کا حل نہیں، لیکن ہم جانتے ہیں کہ ہمیں اپنے ملک کا دفاع کیسے کرنا ہے۔تقریب کے اختتام پر ملک کی سلامتی، ترقی اور شہدا کے درجات کی بلندی کے لیے خصوصی دعا کی گئی.