Live Updates

وفاقی وزیرمحمد حنیف عباسی سے جرمن سفیر الفریڈ گراناز کی ملاقات، سفارتی، اقتصادی و صنعتی تعلقات کو مزید مضبوط بنانے پر تبادلہ خیال

پیر 19 مئی 2025 17:34

اسلام آباد (اُردو پوائنٹ اخبارتازہ ترین - اے پی پی۔ 19 مئی2025ء) وفاقی وزیر ریلوے محمد حنیف عباسی سے پاکستان میں جرمنی کے سفیر الفریڈ گراناز نے پیر کو ایک اہم ملاقات کی جس میں دونوں ممالک کے درمیان سفارتی، اقتصادی اور صنعتی تعلقات کو مزید مضبوط بنانے پر تفصیلی تبادلہ خیال کیا گیا۔ ملاقات کے دوران خاص طور پر پاکستان ریلوے کے نظام کی جدید کاری اور اپ گریڈیشن کے حوالے سے بات چیت کی گئی تاکہ ملکی ریلوے نظام کو جدید ترین ٹیکنالوجی کے مطابق بہتر بنایا جا سکے۔

وفاقی وزیر ریلوے نے جرمنی کے تجربات اور ماہرین کی مہارت سے فائدہ اٹھانے کے عزم کا اظہار کرتے ہوئے کہا کہ پاکستان ریلوے کو نہ صرف بہتر انفراسٹرکچر بلکہ جدید تکنیکی سہولیات بھی فراہم کی جائیں گی تاکہ عوام کو محفوظ، تیز اور معیاری سفری سہولتیں میسر آ سکیں۔

(جاری ہے)

اس ضمن میں دونوں ممالک نے ریلوے سیکٹر میں جدید ٹیکنالوجی کے تبادلے، انفراسٹرکچر کی ترقی اور صنعتی شراکت داری کے مواقع پر بات چیت کی۔

ملاقات کے دوران دونوں فریقین نے مستقبل میں مشترکہ منصوبوں پر کام کرنے کے امکانات پر غور کیا اور اس بات پر اتفاق کیا کہ پاکستان اور جرمنی کے مابین تعلقات کو نئی بلندیوں تک لے جانا چاہیے تاکہ دونوں ممالک کی معیشتوں اور عوام کو فائدہ پہنچے۔وفاقی وزیر ریلوے محمد حنیف عباسی نے جرمن سفیر کو گولڑہ سٹیشن کے تاریخی میوزیم کے دورے کی دعوت دی جو پاکستان کے ریلوے ورثے کی حفاظت اور فروغ کے لیے ایک اہم قدم ہے۔

جرمن سفیر نے اس دعوت کو قبول کرتے ہوئے کہا کہ جرمنی اس حوالے سے پاکستان کے ساتھ تعاون جاری رکھے گا اور مستقبل میں مزید مشترکہ سرگرمیوں کی امید ظاہر کی۔یہ ملاقات دونوں ممالک کے درمیان اقتصادی، صنعتی، ثقافتی اور تکنیکی تعاون کو فروغ دینے کے لیے ایک مثبت پیش رفت ہے اور اس سے پاکستان ریلوے کے نظام کی بہتری اور دونوں ممالک کے قریبی تعلقات کو مزید تقویت ملے گی۔