گورنر خیبر پختونخوا سے نیدرلینڈ کی سفیر ہینی فوکل ڈی وریز کی ملاقات

پشاور(اُردو پوائنٹ اخبارتازہ ترین - این این آئی۔ 20 مئی2025ء) گورنر خیبر پختونخوا فیصل کریم کنڈی سے نیدرلینڈ کی سفیر ہینی فوکل ڈی وریز نے منگل کے روز گورنر ہاؤس پشاور میں ملاقات کی، جس میں دوطرفہ تعلقات، سرمایہ کاری، امن و امان کی صورتحال اور سماجی ترقیاتی منصوبوں سمیت دیگر اہم امور پر تفصیلی تبادلہ خیال کیا گیا۔ملاقات میں موسمیاتی تبدیلی کے اثرات اور ان سے نمٹنے کے لیے حفاظتی اقدامات، افغان مہاجرین کی واپسی اور فنی تعلیم کے فروغ جیسے موضوعات پر بھی گفتگو ہوئی۔

دونوں رہنماؤںنے صحت، تجارت، کھیلوں، عوامی روابط اور انسانی ہمدردی کے شعبوں میں باہمی تعاون کو مزید وسعت دینے پر اتفاق کیا۔گورنر فیصل کریم کنڈی نے نیدرلینڈ حکومت کی جانب سے صوبے میں جاری سماجی و ترقیاتی سرگرمیوں کو سراہتے ہوئے ان کا شکریہ ادا کیا۔

(جاری ہے)

انہوں نے کہا کہ پاکستان اور نیدرلینڈ کے درمیان دیرینہ دوستانہ تعلقات قائم ہیں، جنہیں مزید فروغ دیا جانا وقت کی ضرورت ہے۔

گورنر نے خیبر پختونخوا میں امن و امان کی بحالی کے لیے سیکیورٹی فورسز کی قربانیوں اور کوششوں کو اجاگر کرتے ہوئے کہا کہ دہشت گردی کے مکمل خاتمے کے لیے ہم پرعزم ہیں۔ انہوں نے افغانستان میں موجود دہشت گردوں کی پناہ گاہوں اور سرحد پار سے ہونے والی مداخلت پر بھی تشویش کا اظہار کیا۔افغان مہاجرین کے مسئلے پر بات کرتے ہوئے گورنر نے واضح کیا کہ پاکستان نے دہائیوں تک افغان مہاجرین کی میزبانی کی ہے، تاہم اب غیرقانونی طور پر مقیم افراد کی باعزت واپسی کا عمل حکومتی پالیسی کے تحت جاری ہے۔

انہوں نے کہا کہ اس عمل میں انسانی ہمدردی اور بین الاقوامی قوانین کا مکمل خیال رکھا جا رہا ہے۔فنی تعلیم کے فروغ پر گفتگو کرتے ہوئے گورنر نے کہا کہ خیبر پختونخوا میں نوجوانوں کو ہنرمند بنانے کے لیے نیدرلینڈز کے ساتھ تعاون کو مزید بڑھانے کی ضرورت ہے تاکہ نوجوانوں کو روزگار کے بہتر مواقع میسر آئیں اور معیشت مضبوط ہو۔موسمیاتی تبدیلی کے بڑھتے ہوئے خطرات اور ان کے اثرات پر گفتگو کرتے ہوئے دونوں رہنماؤں نے اس بات پر زور دیا کہ اس چیلنج سے نمٹنے کے لیے مشترکہ حکمت عملی اور ٹیکنیکل تعاون ناگزیر ہے۔ اس سلسلے میں ماحول دوست پراجیکٹس، تربیتی پروگرامز اور ماحولیاتی شعور اجاگر کرنے کے لیے اقدامات پر بھی بات ہوئی۔