فوج میں فیلڈ مارشل عہدہ کیا ہوتا ہے؟

راولپنڈی ( اُردو پوائنٹ اخبارتازہ ترین۔ 20 مئی 2025ء ) فوج میں فیلڈ مارشل عہدہ کیا ہوتا ہے؟۔ تفصیلات کے مطابق آرمی چیف جنرل عاصم منیر سابق فوجی صدر ایوب خان کے بعد فیلڈ مارشل کے عہدے پر ترقی پانے والے دوسرے فوجی جنرل بن گئے۔ اس پیش رفت کے بعد فیلڈ مارشل عہدے سے متعلق تفصیلات بھی سامنے آئی ہیں۔ بتایا گیا ہے کہ فیلڈ مارشل بری فوج کے افسران میں سب سے زیادہ سینئر اور فائیو اسٹار افسر ہوتا ہے، یہ فوج میں جنرل کے عہدے سے اوپر کا اعلیٰ ترین عہدہ ہے۔

بری فوج میں آرمی چیف فور اسٹار جنرل ہوتا ہے جبکہ فیلڈ مارشل کے رینک میں ایک اسٹار کا اضافہ ہوجاتا ہے، یعنی 5 اسٹار ہو جاتے ہیں۔ فیلڈ مارشل کا اعزاز غیر معمولی اور مثالی قیادت اور خدمات پر دیا جاتا ہے۔ جبکہ فضائیہ اور نیوی سروسز میں بھی 2 ایسے عہدے ہیں جو فیلڈ مارشل کے مساوی ہوتے ہیں۔

(جاری ہے)

فیلڈ مارشل کے مساوی ایڈمرل آف دی فلیٹ (نیوی)، مارشل آف دی ایئر فورس (ایئر فورس) کے افسران آتے ہیں۔

فیلڈ مارشل کے اختیارات کے حوالے سے بتایا گیا ہے کہ فیلڈ مارشل کا عہدہ ایک اعزازی عہدہ ہے اور اِسے کوئی اضافی اختیارات یا مراعات نہیں دی جاتیں۔ فیلڈ مارشل کے عہدے کے ساتھ کسی خاص کمان کی ذمہ داری نہیں ہوتی بلکہ یہ ایک اعزاز کی علامت ہوتا ہے۔ پاکستانی قانون میں فیلڈ مارشل کی تقرری کا کوئی مستقل یا بار بار چلنے والا طریقہ کار نہیں ہے۔

رینک اضافی قانون سازی، ایگزیکٹو، یا عدالتی اختیارات نہیں دیتا ہے اور یہ عہدہ اپنے وقار کے باوجود ماورائے آئین اختیار نہیں دیتا۔ واضح رہے کہ وزیراعظم شہباز شریف کی زیرصدارت وفاقی کابینہ کے اجلاس میں آج اہم فیصلے ہوئے جہاں وفاقی کابینہ نے جنرل سید عاصم منیر (نشان امتیاز ملٹری) کو فیلڈ مارشل کے عہدے پر ترقی دینے کی منظوری دی، حکومت نے ائیر چیف مارشل ظہر احمد بابر سدھو کی مدت ملازمت پوری ہونے پر ان کی خدمات کو بھی جاری رکھنے کا بھی متفقہ فیصلہ کیا، وزیراعظم شہباز شریف نے صدر مملکت آصف علی زرداری سے ملاقات کرکے انہیں اس فیصلے کے حوالے سے اعتماد میں لیا۔

میڈیا رپورٹس کے مطابق معرکہ حق آپریشن بنیان مرصوص کی اعلیٰ حکمتِ عملی اور دلیرانہ قیادت کی بنیاد پر ملک کی سلامتی کو یقینی بنانے اور دشمن کو شِکست فاش دینے پر حکومت پاکستان کی جانب سے جنرل سید عاصم منیر کو فیلڈ مارشل کے عہدے پر ترقی دینے کی منظوری دی گئی، کابینہ اجلاس کے دوران وزیراعظم نے یہ تجویز پیش کی، جس پر جنرل سید عاصم منیر کو فیلڈ مارشل کے عہدے پر ترقی دینے کی شہبازشریف کی تجویز کابینہ نے منظور کرلی۔

آپریشن بنیان مرصوص کے دوران گراں قدر خدمات انجام دینے والوں کو اعلی سرکاری ایورڈز سے نوازانے کا بھی فیصلہ کیا گیا۔ وفاقی کابینہ نے متفقہ فیصلہ کیا کہ افواج پاکستان کے افسران و جوان، غازیان، شہدا اور مختلف شعبوں سے تعلق رکھنے والے پاکستانی شہریوں کو آپریشن بنیان مرصوص کے دوران ان کی گراں قدر خدمات کے اعتراف میں اعلی سرکاری ایورڈز سے نوازا جائے گا ۔