}استحکام پاکستان پارٹی کے تاجر ونگ کا قیام، ملک ابوذر صدر نامزد

xلاہور (اُردو پوائنٹ اخبارتازہ ترین - آن لائن۔ 20 مئی2025ء) استحکام پاکستان پارٹی کا تاجر ونگ قائم کر دیا گیا۔ استحکام پاکستان پارٹی کے مرکزی و صوبائی رہنماؤں کی جانب سے نوٹیفکیشن تقسیم کی تقریب میں پاک فوج کے سپہ سالار حافظ سید جنرل عاصم منیر کو فیلڈ مارشل بننے پر مبارکباد پیش کی گئی۔ گزشتہ روز استحکام پاکستان پارٹی کے سیکریٹریٹ میں منعقد کی گئی تقریب میں آئی پی پی تاجر ونگ کی صدارت کے لئے ملک ابوذر کو نامزد کر دیا گیا۔

مرکزی سیکرٹری میاں خالد محمود، صدر آئی پی پی پنجاب رانا نذیر احمد خان، صوبائی جنرل سیکرٹری و ایم پی اے شعیب صدیقی نے بطور مہمانان خصوصی شرکت کی اور ملک ابوذر کو نوٹیفیکیشن دیا۔ صدر آئی پی پی عبد العلیم خان کی منظوری سے نامزدگی عمل میں لائی گئی۔

(جاری ہے)

تقریب کی میزبانی صدر آئی پی پی لاہور ملک زمان نصیب، جنرل سیکرٹری رانا جاوید اقبال نے کی جبکہ صدر آئی پی پی شعبہ خواتین تسکین خاکوانی، ضلعی صدر ڈاکٹر جویریہ سہروردی، صدر یوتھ ونگ غضنفر علی عامر و دیگر پارٹی رہنماؤں نے بھی شرکت کی۔

اس موقع پر گفتگو کرتے ہوئے آئی پی پی کے رہنماؤں کا کہنا تھا کہ سپہ سالار پاک فوج حافظ جنرل عاصم منیر کو فیلڈ مارشل کے عہدے پر فائز ہونے پر مبارکباد پیش کرتے ہیں۔ مرد حق سپہ سالار جنرل عاصم منیر کے کارناموں کی پوری دنیا معترف ہے۔ آج پاکستان کی عسکری تاریخ میں نئے اور انتہائی روشن باب کا اضافہ ہوا ہے۔ بیرون ملک مقیم پاکستانی افواج پاکستان کی بہادری پر فخر کر رہے ہیں۔

پاکستانی قوم کو پوری دنیا میں بہادر شمار کیا جا رہا، دلیر افواج نے اپنا سکہ منوایا۔ آج بھارت بدحالی کی حالت میں ہے، آئندہ اس سے بھی زیادہ ہزیمت اٹھانی پڑی گی۔ افواج پاکستان ہی استحکام پاکستان ہے۔ پاکستان عام اسلام کی قیادت کرے گا۔ انہوں نے مزید کہا کہ صدر آئی پی پی عبد العلیم خان کے انتخابی حلقہ این اے 117 سے تعلق رکھنے والی تاجر برادری کو پارٹی میں خوش آمدید کہتے ہیں۔

ملک ابوذر کی قیادت میں تاجر برادری کے قافلے کو مزید بڑھائیں گے۔ اس حلقے میں بیس سال سے التوا کا شکار ترقیاتی کام مکمل ہو چکے۔ انشائ اللہ این اے 117 جو لاہور کا پسماندہ علاقہ ہے اسے ماڈل ٹاؤن کے معیار تک پہنچائیں گے۔ پوری دنیا پاکستان کی سفارتی اور عسکری کارکردگی کو سراہا رہی ہے۔ ملک ابوذر کو ٹیم سمیت پارٹی میں شمولیت پر مبارکباد پیش کرتے ہیں۔

تاجر برادری کاروباری طبقے کی سیاست میں ریڑھ کی ہڈی کی حیثیت رکھتی ہے۔ پنجاب بھر میں تنظیم سازی کی جا رہی ہے، تاجر ونگ کا قیام ایک خوشگوار اضافہ ہے۔ تاجر ونگ کا قیام تاجروں کے مسائل حل کرنے میں کردار ادا کریں گے۔ آئی پی پی تعمیر ترقی و خوشحالی کا منشور لے کر میدان میں آئی ہے۔ رہنماؤں نے شہریوں کو 23 مئی کو لیہ کے معرکہ حق کنونشن میں شمولیت کی دعوت دی۔ تاجر ونگ کے قیام سے ہماری جماعت مزید مضبوط ہوئی ہے۔