مودی کی ہندوتوا پالیسیوں ،جنگی جنون کی وجہ سے جنوبی ایشیاء کے امن کو خطرہ ہے، بیرسٹر سلطان

راولا کوٹ (اُردو پوائنٹ اخبارتازہ ترین - این این آئی۔ 21 مئی2025ء)صدر ریاست آزاد جموں وکشمیر و چانسلر آزاد جموں وکشمیر جامعات بیرسٹر سلطان محمود چوہدری نے کہا ہے کہ مودی کی ہندوتوا پالیسیوں اور جنگی جنون کی وجہ سے جنوبی ایشیاء کے امن کو خطرہ ہے۔مودی سرکار نے مقبوضہ کشمیر کے اندر پہلگام میں فالس فلیگ آپریشن کو بنیاد بنا کر اپنے سیاسی فائدے کے لئے پاکستان پر حملہ کرتے ہوئے بے گناہ شہریوں کی املاک کو نشانہ بنایا اور معصوم لوگوں کو شہید کیا بھارت کی اس فسطائیت کی ہم بھرپور مذمت کرتے ہیں۔

پاک افواج نے بھارت کی جنگی جارحیت کا منہ توڑ جواب دیا اور بھارت کے جنگی جنون کو خاک میں ملایا اور بھارت کو گھٹنے ٹیکنے پر مجبور کر دیا ۔ پاک فوج کی اس فتح پر پوری قوم پاک افواج کو سلام پیش کرتی ہے۔

(جاری ہے)

میں آج یہاں شہیدوں اور غازیوں کی دھرتی راولاکوٹ سے مقبوضہ کشمیر کے عوام کو یقین دلاتا ہوں کہ آزادی کی جدوجہد میں وہ تنہا نہیں اور آزادکشمیر کا بچہ بچہ اُن کے شانہ بشانہ ہے اور ہماری یہ جدوجہد مقبوضہ کشمیر کی آزادی تک جاری رہے گی۔

ہماری پاک فوج اور پاک فضائیہ ہمہ وقت ملکی سرحدوں کی حفاظت اور دشمن کی کسی بھی جارحیت کا جواب دینے کے لئے تیار ہیں اور پاکستانی اور کشمیری قوم پاک فوج کے ساتھ شانہ بشانہ کھڑی ہیں۔ میرے لیے یہ باعث فخر ہے کہ میں آج منتخب عوامی نمائندوں اور معززین علاقہ کی موجودگی میں جامعہ پونچھ راولاکوٹ کے (چھوٹا گلہ کیمپس) کا سنگ بنیاد رکھ رہا ہوں ، اس منصوبے کا افتتاح میرے لیے ایک خواب کے ساتھ چیلنج بھی تھا ۔

میں اس موقع پر وائس چانسلر جامعہ پونچھ پروفیسر ڈاکٹر ذکریا ذاکر اور اُن کی ٹیم کو مبارکباد دیتا ہوں کہ انہوں نے اس منصوبے کو دوبارہ شروع کرنے کے لئے طویل جدوجہد کی اور مجھے امید ہے کہ 3.5ارب روپے کی بھاری لاگت سے تعمیر ہونے والا یہ پروجیکٹ نہ صرف جامعہ پونچھ کی تدریسی اور تحقیقی سرگرمیوں میں اہم تبدیلیوں کا باعث بنے گا اور انشاء اللہ یہ پروجیکٹ اگلے سال اگست 2026میں پایہ تکمیل کو پہنچے گا۔

یہ منصوبہ اس علاقے کی معاشی سرگرمیوں میں بھی ترقی لانے کے لئے اہم ثابت ہو گا۔ ہمارے لیے سب سے قابل فخر بات یہ ہے کہ ہم قوم کے مستقبل اور آج کی نوجوان نسل پر بھاری سرمایہ کاری کر رہے ہیں اور یہی ہماری حکومت کی اولین ترجیح ہے کیونکہ نوجوان ہی ہمارا مستقبل ہیں اور نوجوانوں پر سرمایہ کاری دراصل اس قوم کے روشن مستقبل کے لئے سرمایہ کاری ہے۔

اس مقصد کے لئے حکومت نے اعلیٰ تعلیم کے شعبہ میں بھاری سرمایہ کاری کی ہے۔ اس وقت آزاد کشمیر میں اعلیٰ تعلیم کے فروغ کے لئے 6پبلک سیکٹر یونیورسٹیز موجود ہیں جن میں ہزاروں کی تعداد میں طلبہ و طالبات انتہائی پرامن اور سازگار ماحول میں معیاری تعلیم حاصل کر رہے ہیں۔ مجھے اس بات کی بھی بے حد خوشی ہے کہ جامعہ پونچھ میں اس وقت عالمی معیار کی فیکلٹی موجود ہے جو نہ صرف طلبہ کی تعلیم اور تحقیق پر توجہ دے رہی ہے بلکہ طلبہ کی کردار سازی اور کیرئیر کونسلنگ پر بھی خصوصی توجہ دی جا رہی ہے۔

ان خیالات کااظہار صدر ریاست آزاد جموں و کشمیرو چانسلر آزاد جموں وکشمیر جامعات بیرسٹر سلطان محمود چوہدری نے جامعہ پونچھ کے چھوٹا گلہ کیمپس کا سنگ بنیاد رکھنے کی تقریب سے بطور مہمان خصوصی خطاب کرتے ہوئے کیا۔ اس موقع پر تقریب میں سابق صدر آزادکشمیر سردار محمد یعقوب خان، ممبر آزادجموں وکشمیر قانون ساز اسمبلی سردار حسن ابراہیم خان ، سابق وزیر حکومت سردار عابد حسین عابد،وائس چانسلر جامعہ پونچھ پروفیسر ڈاکٹر ذکریا ذاکر،صدارتی مشیر سردار امتیاز خان اور دیگر بھی موجود تھے۔

اس موقع پر وائس چانسلر جامعہ پونچھ پروفیسر ڈاکٹر ذکریا ذاکر نے چھوٹا گلہ کیمپس کے پروجیکٹ پر صدر ریاست آزادجموں وکشمیر و چانسلر آزاد جموں وکشمیر جامعات بیرسٹر سلطان محمود چوہدری کو بریفنگ بھی دی۔ اس موقع پر صدر ریاست آزاد جموں و کشمیرو چانسلر آزاد جموں وکشمیر جامعات بیرسٹر سلطان محمود چوہدری نے اپنے خطاب میں مزید کہا کہ میں کویت فنڈ فار عرب اکنامک ڈویلپمنٹ کا خصوصی طور پر شکریہ ادا کرتا ہوں جن کے تعاون سے ہم اس منصوبے کو تکمیل تک پہنچانے کے لئے پر عزم ہیں۔

میں چھوٹا گلہ کمیونٹی کا بھی شکریہ ادا کرتا ہوں کہ جنہوں نے اس منصوبے کو عملی جامہ پہنانے کے لئے اپنی زمینیں دیں ۔ صدر ریاست آزاد جموں و کشمیرو چانسلر آزاد جموں وکشمیر جامعات بیرسٹر سلطان محمود چوہدری نے کہا کہ اب انشاء اللہ وہ وقت قریب ہے کہ آپ اپنی دہلیز پر ایک عالمی معیار کی جدید یونیورسٹی دیکھیں گے اور میں جامعہ پونچھ راولاکوٹ کے روشن مستقبل اور ترقی کے لئے پرامید ہوں۔اس سے قبل صدر ریاست آزاد جموں وکشمیر و چانسلر آزاد جموں وکشمیر جامعات بیرسٹر سلطان محمود چوہدری نے چھوٹا گلہ کیمپس کے سنگ بنیاد رکھنے کے موقع پرتختی کی نقاب کشائی بھی کی۔