Live Updates

جنرل عاصم منیر کی فیلڈ مارشل تقرری پر مصطفی کمال اور انیس قائم خانی کی مبارکباد

یہ فیصلہ پاکستان کی علاقائی سالمیت، قومی یکجہتی اور دفاعی استحکام کو مضبوط تر بنانے کے لیے ایک فیصلہ کن قدم ہے،رہنما ایم کیو ایم پاکستان

بدھ 21 مئی 2025 19:55

جنرل عاصم منیر کی فیلڈ مارشل تقرری پر مصطفی کمال اور انیس قائم خانی ..

کراچی (اُردو پوائنٹ اخبارتازہ ترین - این این آئی۔ 21 مئی2025ء)آرمی چیف جنرل عاصم منیر کی بطور فیلڈ مارشل تقرری پر ایم کیو ایم پاکستان کے مرکزی رہنماں مصطفی کمال اور انیس قائم خانی نے مبارکباد دی۔وفاقی وزیر صحت سید مصطفی کمال نے جنرل سید عاصم منیر کو فیلڈ مارشل کے تاریخی اور اعلی ترین عسکری عہدے پر تقرری پر دلی مبارکباد پیش کرتے ہوئے اسے قوم کے عسکری اداروں پر غیر متزلزل اعتماد کا مظہر قرار دیا ہے۔

انہوں نے اپنے بیان میں کہا کہ یہ تقرری نہ صرف پاک فوج کی قیادت پر بھرپور اعتماد کا اظہار ہے بلکہ یہ پاکستان کو مزید مستحکم، محفوظ اور ناقابلِ تسخیر بنانے کے قومی عزم کی بھی بھرپور عکاسی کرتی ہے۔سید مصطفی کمال کے مطابق یہ فیصلہ پاکستان کی علاقائی سالمیت، قومی یکجہتی اور دفاعی استحکام کو مضبوط تر بنانے کے لیے ایک فیصلہ کن قدم ہے۔

(جاری ہے)

ایم کیو ایم پاکستان کے سینئر مرکزی رہنما انیس احمد قائمخانی نے بھی جنرل سید عاصم منیر کو فیلڈ مارشل کے عہدے پر فائز کیے جانے پر دلی مبارکباد پیش کی اور اسے قومی سلامتی کے حوالے سے ان کی بے مثال قیادت اور خدمات کا اعتراف قرار دیا۔انہوں نے کہا کہ یہ تاریخی اعزاز ان کی غیر معمولی عسکری بصیرت، قومی دفاع میں کلیدی کردار اور ریاستی اداروں پر قوم کے اعتماد کی روشن علامت ہے۔

ایم کیو ایم پاکستان نے اپنے بیان میں اس عزم کا اعادہ کیا ہے کہ وہ ادارہ جاتی ہم آہنگی، آئینی استحکام اور قومی اتحاد کے ہر قدم میں ملک کی قیادت کے شانہ بشانہ کھڑی رہے گی۔یہ تقرری ملک میں جمہوری تسلسل، سول-ملٹری ہم آہنگی اور داخلی سلامتی کو مزید مضبوط بنانے کی جانب ایک اہم سنگِ میل قرار دی جا رہی ہے۔