Live Updates

خضدار میں سکول بچوں کی بس پر حملہ انسانیت کے منہ پر طمانچہ ہی:خرم نواز گنڈاپور

بدھ 21 مئی 2025 23:00

لاہور (اُردو پوائنٹ اخبارتازہ ترین - آن لائن۔ 21 مئی2025ء) پاکستان عوامی تحریک کے سیکرٹری جنرل خرم نواز گنڈاپور نے بلوچستان خضدار میں بچوں کی سکول بس پر خودکش حملہ کی شدید الفاظ میں مذمت کرتے ہوئے اسے انسانیت پر حملہ قراردیا ہے۔ کوئی گرا ہوا ذہن ہی اس طرح کی کارروائی میں ملوث ہو سکتا ہے۔ بچوں پر حملہ کرنے والے دہشت گرد اور منصوبہ ساز انسانیت کے منہ پر طمانچہ ہیں، انہوں نے کہا کہ وہ دشمن جو سامنے آ کر لڑنے کی جرآت سے محروم ہے وہ چھپ کر اب ہمارے بچوں کو نشانہ بنارہے ہیں، دہشت گردوں اور پس پردہ منفی کرداروں کا یہ عمل قابل مذمت بھی ہے اور قابل گرفت بھی ہے، قانون نافذ کرنے والے ادارے دہشت گردی کی اس واردات میں ملوث تمام کرداروں کو عبرتناک سزا دینے کے لئے تمام ریاستی وسائل بروئے کار لائیں۔

(جاری ہے)

انہوں نے کہا کہ شہید بچوں کے والدین کے ساتھ دلی تعزیت کا اظہار کرتے ہیں، اللہ رب العزت اٴْنہیں صبر دے۔ ان شاء اللہ معصوم بچوں کا یہ خون رائیگاں نہیں جائے گا،دہشت گرد اپنے ناپاک ارادوں کے ساتھ نیست و نابود ہونگے، پوری دنیا کو دہشت گردی کی اس واردات پر پاکستان اور اس کے عوام کے ساتھ کھڑا ہونا چاہیے اور دہشت گردوں کے نیٹ ورک کو توڑنے کے لئے ہر طرح کی مدد کرنی چاہیے۔ پاکستان نے دہشت گردی کی جنگ میں جان و مال کی لا تعداد قربانیاںدی ہیں، ہم دنیا کے امن کے لئے مسلسل قربانیاں دینے والی قوم ہیں۔