Live Updates

پاک بھارت کشیدگی؛ چین نے پاکستان کو J35A طیاروں کی فراہمی تیز کردی، 50 فیصد رعایت کی پیشکش

اس پیشرفت کو حالیہ تناؤ کے دوران پاکستان فضائیہ کی ہندوستان کے خلاف کارکردگی کے لئے براہ راست "انعام" کے طور پر دیکھا جارہا ہے؛ رپورٹ

ساجد علی جمعرات 22 مئی 2025 11:24

پاک بھارت کشیدگی؛ چین نے پاکستان کو J35A طیاروں کی فراہمی تیز کردی، 50 ..

بیجنگ/اسلام آباد ( اُردو پوائنٹ اخبارتازہ ترین۔ 22 مئی 2025ء ) پاک بھارت کشیدگی کے تناظر میں چین نے پاکستان کو J35A طیاروں کی فراہمی تیز کرتے ہوئے 50 فیصد رعایت کی بھی پیشکش کردی۔ میڈیا رپورٹس کے مطابق چین اپنے جدید ٹیکنالوجی کے حامل J35A ففتھ جنریشن اسٹیلتھ فائٹر جیٹس کو اپنے دیرینہ سٹریٹجک حلیف پاکستان تک پہنچانے میں نمایاں طور پر تیزی لایا ہے، اس حوالے سے سفارتی ذرائع کا کہنا ہے کہ حالیہ ہندوستان پاکستان تنازعہ کے بعد چین کی طرف سے یہ ایک "انعام" ہے۔

بتایا گیا ہے کہ پاکستان کے وزیر دفاع خواجہ آصف فی الحال ان پیشرفتوں کے درمیان چین کے دورے پر ہیں، ذرائع سے پتا چلا ہے کہ پاکستان کو J35A فائٹر جیٹ کے 30 طیاروں کے پہلے بیچ کے اب اگست 2025ء کے اوائل میں ہی اسلام آباد پہنچنے کی توقع کی جارہی ہے، اس فوجی منتقلی کی اسٹریٹجک نوعیت کو مزید اجاگر کرتے ہوئے، اعلی سفارتی ذرائع نے اس بات کی تصدیق کی ہے کہ چین نے ادائیگی کے سازگار آپشن کے ساتھ ساتھ J35A لڑاکا طیاروں پر پاکستان کو 50 فیصد کی تک چھوٹ کی پیش کش بھی کی ہے۔

(جاری ہے)

معلوم ہوا ہے کہ اس معاہدے پر تیز رفتاری سے عمل کے حوالے سے چینی اور پاکستانی عہدیداروں کے مابین اسلام آباد اور بیجنگ میں حالیہ اعلیٰ سطح کی ملاقاتوں میں اتفاق ہوا، دونوں ممالک کے اعلیٰ حکام کے مابین ان میٹنگز میں مبینہ طور پر ہندوستان کی جانب سے فوجی ساز و سامان پر کی جانے والی سرمایہ کاری کی کوششوں سمیت پیچیدہ علاقائی سلامتی کے منظر نامے کے تناظر میں سٹریٹجک فوجی تعاون کو بڑھانے پر غور کیا گیا۔

بتایا جارہا ہے کہ چین کی جانب سے سامنے آنے والی اس پیشرفت کو حالیہ تناؤ کے دوران پاکستان فضائیہ کی ہندوستان کے خلاف کارکردگی کے لئے براہ راست "انعام" کے طور پر دیکھا جارہا ہے، پاکستان کی جانب سے J35A ففتھ جنریشن اسٹیلتھ فائٹرز 40 طیاروں کی خریداری کا ارادہ پہلی بار 2024ء کے آخر میں ظاہر کیا گیا تھا، اس حوالے سے دونوں ممالک کے مابین ابتدائی معاہدے میں پہلے ہی موجودہ سال کے اندر 30 طیاروں پر مشتمل بیچ J35A طیاروں کی فراہمی کا اندازہ لگایا گیا تھا۔