سوشل میڈیا اور سیاسی سطح پر میرے خلاف جاری مہم غلط فہمی کا نتیجہ ہے، چیئرمین پی ٹی اے

 اسلام آباد(اردوپوائنٹ اخبار تازہ ترین۔22 مئی 2025)پاکستان ٹیلی کمیونیکیشن اتھارٹی (پی ٹی اے) کے چیئرمین حفیظ الرحمان کا کہنا ہے کہ سوشل میڈیا اور سیاسی سطح پر میرے خلاف جاری مہم ایک غلط فہمی کا نتیجہ ہے، معزز سینیٹر کے ساتھ ایک ہلکے پھلکے انداز میں تبادلہ خیال ہوا اس سے کسی کو رنج پہنچا تو کمیٹی کے روبرو پہلے ہی معذرت کرچکا ہوں، چیئرمین پی ٹی اے حفیظ الرحمان نے قائمہ کمیٹی میں پیش آنے والے واقعہ پر وضاحت جاری کرتے ہوئے کہا ہے کہ غلط فہمی کی بنیاد پر پیش آنے والے واقعے پر افسوس ہے کسی بھی قسم کی بے ادبی یا غیر پارلیمانی زبان استعمال کرنے کا کوئی ارادہ نہ تھا۔

چیئرمین پی ٹی اے نے اپنے وضاحتی بیان میں پارلیمانی آداب کی مکمل پاسداری کرتے ہوئے ملک و قوم کی خدمات جاری رکھنے کے عزم کا اعادہ بھی کیا ہے۔

(جاری ہے)

چیئرمین پی ٹی اے حفیظ الرحمان کا مزید کہنا تھا کہ سینیٹر ایمل ولی خان کے معزز خاندان کو نہایت عزت و احترام کی نگاہ سے دیکھتا ہوں سینیٹ کے تمام اراکین کا دل سے احترام ہے۔خیال رہے کہ گزشتہ روزسینیٹ کی قائمہ کمیٹی برائے انفارمیشن ٹیکنالوجی کے اجلاس میں چیئرمین پاکستان ٹیلی کمیونیکیشن اتھارٹی حفیظ الرحمان اور سینیٹر ایمل ولی خان کے درمیان تلخ کلامی ہوئی تھی۔

چیئرمین پی ٹی اے کی جانب سے چرس کے استعمال کے الزام پر سینیٹر ایمل ولی خان اجلاس میں مشتعل ہوگئے تھے انہوں نے چیئرمین پی ٹی اے سے معافی مانگنے کا مطالبہ کیاتھا۔قائمہ کمیٹی کے اجلاس کے دوران چیئرمین پی ٹی اے نے سینیٹر ایمل ولی پر نشہ کرنے کا الزام عائد کرتے ہوئے طنزیہ انداز میں کہا تھا مجھے بھی نشہ دیں۔اے این پی کے سربراہ ایمل ولی یہ سن کر شدید برہم ہوگئے تھے۔

ان کا کہنا تھا کہ آپ کو یہ جرات کس نے دی کہ مجھ سے اس انداز میں بات کریں؟ ایک سرکاری ملازم مجھے کیسے کہہ سکتا تھا کہ تم چرس پی کر آئے ہو؟ یہ انداز بالکل ناقابل قبول تھا۔چیئرمین پی ٹی اے نے اپنی غلطی کا اعتراف کیا تھااور کہا تھاکہ مجھ سے غلطی ہوگئی۔چیئرمین پی ٹی اے ایمل ولی خان سے بار بار معافی مانگتے رہے تھے۔ سینیٹر ایمل ولی خان نے چیئرمین پی ٹی اے کو مخاطب کرتے ہوئے کہا تھا کہ اگر آپ چرس اور شراب پیتے ہیں تو ایسی باتیں کیا کریں۔

اس موقع پراے این پی کے سربراہ ایمل ولی خان نے قائمہ کمیٹی سے چیئرمین پی ٹی اے کے خلاف کارروائی کا مطالبہ کیاتھا۔انہوں نے کہا تھا کہ چیئرمین پی ٹی اے اجلاس میں رہے گا یا میں رہوں گا اس پر چیئرمین پی ٹی اے قائمہ کمیٹی کا اجلاس چھوڑ کر چلے گئے تھے۔چیئرمین قائمہ کمیٹی نے معاملہ وزیراعظم کے سامنے اٹھانے کا فیصلہ کیا تھا۔ان کا کہنا تھا کہ وزیراعظم چیئرمین پی ٹی اے کے خلاف ایکشن لیں۔

انہوںنے قائمہ کمیٹی کی سیکریٹری آئی ٹی کو بھی نوٹس لینے کی ہدایت کی تھی۔چیئرمین قائمہ کمیٹی آغا شاہ زیب درانی نے کہا تھاکہ چیئرمین پی ٹی اے کے رویے کی مذمت کرتے ہیں۔ انہوں نے سینیٹر ایمل ولی کی ہی نہیں قائمہ کمیٹی کی توہین کی تھی۔ سینیٹر ایمل ولی نے کہا تھاکہ صرف معافی سے کام نہیں چلے گا اور اب چیئرمین پی ٹی اے کو استعفیٰ دینا ہوگا۔ انہوں نے چیئرمین پی ٹی اے کے خلاف تحریک استحقاق لانے اور وزیراعظم کو اپنے تحفطات سے آگاہ کرنے کا بھی اعلان کیا تھا۔