وزیراعظم اور فیلڈ مارشل کا پختہ عزم ہے کہ فتنہ ہندوستان کو جڑ سے ختم کریں گے، عطا تارڑ

ہم واحد قوم ہیں جس کے بچوں نے بھی قربانیاں دی ہیں جس نے بچوں پرہاتھ ڈالا، انہیں نہیں چھوڑیں گے،انٹرویو

جمعہ 23 مئی 2025 15:13

وزیراعظم اور فیلڈ مارشل کا پختہ عزم ہے کہ فتنہ ہندوستان کو جڑ سے ختم ..

اسلام آباد(اُردو پوائنٹ اخبارتازہ ترین - این این آئی۔ 23 مئی2025ء)وزیر اطلاعات عطا تارڑ نے کہا ہے کہ وزیراعظم اور فیلڈ مارشل کا پختہ عزم ہے کہ فتنہ ہندوستان کو جڑ سے ختم کریں گے، دہشت گردوں اور ان کے سہولت کاروں کو نہیں چھوڑا جائے گا، 10 مئی کو بھارتی حملے کے دن ہی بلوچستان میں 30 مقامات پر حملے روابط ظاہر کرتے ہیں، ہم واحد قوم ہیں جس کے بچوں نے بھی قربانیاں دی ہیں جس نے بچوں پرہاتھ ڈالا، انہیں نہیں چھوڑیں گے۔

نجی ٹی وی کودیئے گئے ایک انٹرویومیں وفاقی وزیر عطا تارڑ نے کہا کہ پاکستان دنیا کی واحد قوم ہے جس کے بچوں نے بھی دہشت گردی کے خلاف جنگ میں قربانیاں دیں اور ان معصوم جانوں کی قربانی کو تاریخ میں سنہری حروف سے لکھا جائے گا۔عطا تارڑ نے کہا کہ 10 تاریخ کو بھارت نے دوبارہ حملے کیے اور اسی روز بلوچستان میں 30 مختلف مقامات پر حملے کیے گئے، جو ایک منظم اور مربوط کارروائی کا حصہ تھے۔

(جاری ہے)

انہوںنے کہاکہ سکول جاتے ہوئے بچوں کی بس پر حملہ ذہنی پستی اور دشمن کی بزدلی کی عکاسی کرتا ہے۔وفاقی وزیر نے شہید ہونے والے بچوں کے اہل خانہ کے حوصلے کو سلام پیش کرتے ہوئے کہا کہ ایسے سانحات کے باوجود قوم کے حوصلے پست نہیں ہوئے،چاہے اے پی ایس کا واقعہ ہو، بھارتی جارحیت ہو یا بلوچستان میں حالیہ حملے، ہماری قوم نے ہر محاذ پر قربانیاں دیں۔

عطا تارڑ نے بھارتی میڈیا پر بھی تنقید کرتے ہوئے کہاکہ وہاں فتنہ ہندوستان کے عناصر کے انٹرویوز دکھائے جا رہے ہیں، جو دراصل دہشتگردوں کی پشت پناہی کا ثبوت ہے،انہوںنے بچوں پر ہاتھ ڈالا ہے ہم انہیں نہیں چھوڑیں گے۔انہوں نے کہا کہ وزیراعظم اور فیلڈ مارشل دونوں کا پختہ عزم ہے کہ فتنہ ہندوستان کو جڑ سے اکھاڑ پھینکا جائے گا۔ عطا تارڑ نے بتایاکہ خضدار دھماکے کا حملہ آور موٹرسائیکل پر سوار تھا اور اس حملے کی مکمل تحقیقات جاری ہیں۔وفاقی وزیر اطلاعات نے اس عزم کا اعادہ کیا کہ دہشتگردوں اور ان کے سہولت کاروں کو کسی صورت بخشا نہیں جائے گا۔