عید کی خوشیاں مستحقین تک پہنچانا ہمارا مشن ہے‘ صدر الخدمت فائونڈیشن ڈاکٹرحفیظ الرحمن

لاہور (اُردو پوائنٹ اخبارتازہ ترین - این این آئی۔ 24 مئی2025ء) الخدمت فائونڈیشن پاکستان کے زیر اہتمام ’’قربانی فی سبیل اللہ 2025‘‘مہم کے آغاز کے موقع پر ایک اہم پریس کانفرنس الخدمت ہیڈ آفس لاہور میں منعقد ہوئی۔ اس موقع پر ڈاکٹر حفیظ الرحمن کاکہنا تھا کہ ہر سال کی طرح رواں برس بھی الخدمت ملک بھر کے غربا،مساکین،یتامی، جیلوں میں قید افراد، بیواں اورخواجہ سراکمیونٹی سمیت دیگر مستحق خاندانوں کے لیے قربانی فی سبیل اللہ کا اہتمام کر رہی ہے۔

اس سال بھی پاکستان کے علاوہ غزہ مہاجرین کے لیے مصر ،اردن القدس اور ویسٹ بینک میں الخدمت چھوٹے اور بڑے جانوروں کی قربانی کے ذریعے غزہ مہاجرین تک قربانی کا گوشت محفوظ طریقے سے پہنچائے گی۔اس سال عیدالاضحی کے موقع پر 6000بڑے اور 4000چھوٹے جانوروں کی قربانی کا ہدف مقرر کیا گیا ہے، جس سے ملک بھر کے 20لاکھ سے زائد مستحق افراد کو گوشت فراہم کیا جائے گا۔

(جاری ہے)

ڈاکٹر حفیظ الرحمن نے اعلان کیا کہ وہ گزشتہ عید الاضحی کی طرح یہ عید فلسطینی مہاجرین کے ساتھ منائیں گے اور مصر میں موجود غزہ کے متاثرین میں قربانی کا گوشت تقسیم کریں گے، تاکہ انہیں عید کے موقع پر تنہا نہ چھوڑا جائے۔ ڈاکٹر حفیظ الرحمن نے کہا کہ ملک کے ساتھ ساتھ بیرون ممالک مقیم پاکستانیوں اور مسلم این جی اوز کا الخدمت پر بھرپور اعتماد ہے اور وہ جو قربانی الخدمت کے سپرد کرتے ہیں، اس کی مکمل شرعی و اخلاقی بنیادوں پر تکمیل اور رپورٹنگ کی جاتی ہے۔

نائب صدر الخدمت ذکر اللہ مجاہد نے کہا کہ الخدمت فائونڈیشن کا ملک گیر نیٹ ورک چاروں صوبوں، آزاد کشمیر اور گلگت بلتستان میں موجود ہے۔ تربیت یافتہ رضاکار، نگران کمیٹیاں اور ویٹرنری ماہرین جانوروں کی خریداری، دیکھ بھال، شرعی قربانی اور شفاف تقسیم کے تمام مراحل کی نگرانی کرتے ہیں۔انہوں نے مزید بتایا کہ الخدمت فائونڈیشن کی جانب سے قربانی کے تمام مراحل کو جدید تقاضوں سے ہم آہنگ کرتے ہوئے تجرباتی کیٹل فارمز، جدید سلاٹر ہائوسز، چِلر ٹرانسپورٹ اور مستحقین تک باعزت ترسیل کو یقینی بنایا جاتا ہے، جبکہ عوام الناس میں دینی شعور، صحت و صفائی اور چرمِ قربانی کی حفاظت سے متعلق آگاہی مہمات کا بھی انعقاد کیا جاتا ہے۔

جس سے قربانی کے عمل میں معیار، شفافیت اور عزتِ نفس کا تحفظ ممکن ہوتا ہے۔انہوں نے مزید کہا کہ سال2024میں غربت کی شرح 7فیصد بڑھی اور ایک کروڑ 30لاکھ مزید پاکستانی غربت کا شکار ہوئے۔ یہاں ہمارے سامنے لاکھوں ایسے گھرانوں کی مثالیں موجودہیں جنھیں دووقت کی روٹی تک میسرنہیں۔ایسے حالات میں الخدمت فانڈیشن جہاں مختلف محاذوں پر اپنے حصے کی شمع روشن کر رہا ہے، وہیں قربانی پراجیکٹ کے ذریعے بھی ضرورت مندوں تک گوشت فراہم کر رہا ہے۔

صدر الخدمت فائونڈیشن پاکستان ڈاکٹر حفیظ الرحمن، کی زیر صدارت منعقدہ پریس کانفرنس میں نائب صدر زکر اللہ مجاہد، الخدمت پنجاب کے صدر اکرام الحق سبحانی، سیکرٹری جنرل الخدمت لاہور ریجن پروفیسر ڈاکٹر اعجاز نذیر اور نیشنل ڈائریکٹر الخدمت کمیونٹی سروسز عامر محمود چیمہ نے شرکت کی۔