مودی فنڈ روک کر تعاون پر مبنی وفاقیت کی خلاف ورزی کر رہے ہیں،ایم کے اسٹالن

اتوار 25 مئی 2025 14:30

نئی دہلی (اُردو پوائنٹ اخبارتازہ ترین - اے پی پی۔ 25 مئی2025ء) بھارت کی ریاست تامل ناڈو کے وزیر اعلیٰ ایم کے اسٹالن نے تعلیم کے لیے فنڈز روکنے پر بی جے پی کی زیر قیادت بھارتی حکومت کو شدید تنقید کا نشانہ بناتے ہوئے اس اقدام کو تعاون پر مبنی وفاقیت کی خلاف ورزی اور ریاستوں کے حقوق کے لیے نقصان دہ قرار دیا ہے۔کشمیر میڈیا سروس کے مطابق ایم کے اسٹالن نے بھارتی وزیر اعظم نریندر مودی کی زیر صدارت ''نیتی آیوگ ''کی گورننگ کونسل کے اجلاس سے خطاب کرتے ہوئے کہا کہ ریاستوں کے لیے واجب الادا اور پہلے سے منظور شدہ فنڈز کو من مانی طور پرروکنا، تاخیرکرنا یا کم کرناناقابل قبول ہے۔

انہوں نے کہا کہ اس طرح کے اقدامات سے ریاستیں اپنے جائز حصے کے لیے عدالتوں سے رجوع کرنے پر مجبور ہوتی ہیں جس سے وفاقی تعاون کے تصور کو نقصان پہنچتا ہے۔

(جاری ہے)

سماگرا شکشا اسکیم کے تحت جو 2018میں شروع کی گئی تھی، اسکولی تعلیم کے بنیادی ڈھانچے کو بہتر بنانے کے لیے ریاستوں کو مالی مدد فراہم کی جاتی ہے۔ اسٹالن نے بتایا کہ تامل ناڈو نے حال ہی میں بھارتی سپریم کورٹ سے رجوع کیاجس میں کہا گیا ہے کہ مودی حکومت نے متنازعہ قومی تعلیمی پالیسی 2020، وزیراعظم ایس ایچ آر آئی ا سکولز اقدام اور تین زبانوں کے فارمولے کو نافذ کرنے سے انکار کے بدلے میں ریاست کے فنڈز روک دیے ہیں۔

اسٹالن نے خبردار کیا کہ سیاسی بنیادوں پر مودی کے فیصلے سے سرکاری اسکولوں میں داخلہ لینے والے لاکھوں طلباء براہ راست متاثر ہو رہے ہیں۔تلنگانہ کے وزیر اعلیٰ ریونت ریڈی نے بھی اسی طرح کے خدشات کا اظہارکرتے ہوئے کہا کہ بھارت کی ترقی ریاستوں کی ترقی سے گہرا تعلق رکھتی ہے۔انہوں نے کہاکہ یہ ضروری ہے کہ ہم تیزی سے ترقی کرنے والی ریاستوں کی حمایت کریں اور اس کا فائدہ اٹھائیںاور ان لوگوں کے لیے ضروری مدد فراہم کریں جو آگے بڑھنے کی کوشش کررہے ہیں۔ اجلاس میں اپوزیشن کے زیر اقتدار ریاستوں کے کئی وزرائے اعلیٰ نے شرکت نہیں کی جن میں مغربی بنگال کی وزیر اعلیٰ ممتا بنرجی، کرناٹک کے وزیر اعلیٰ سدارامیا اور کیرالہ کے وزیر اعلیٰ پنارائی وجین شامل ہیں۔