مقبوضہ کشمیر،محاصرے اورتلاشی کی کارروائیوں اورگھروں پر چھاپوں کی شدید مذمت، ضلع کٹھوعہ میں بھارتی فوج کے دو بریگیڈ تعینات

پیر 26 مئی 2025 16:56

سرینگر (اُردو پوائنٹ اخبارتازہ ترین - اے پی پی۔ 26 مئی2025ء) غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے بھارتی فورسز کی طرف سے جاری محاصرے اور تلاشی کی کارروائیوں اور گھروں پر چھاپوں کے دوران گرفتاریوں اور کشمیریوں کو ہراساں کئے جانے پرسخت تشویش کا اظہار کیا ہے۔ کشمیرمیڈیاسروس کے مطابق حریت کانفرنس کے ترجمان ایڈووکیٹ عبدالرشید منہاس نے سرینگر میں جاری ایک بیان میں کہا ہے کہ کشمیریوں نے تنازعہ کشمیر کے بارے میں بھارتی قابض انتظامیہ کے بیانیہ کو مسترد کردیا ہے جس کے بعد ان کے خلاف انتقامی کارروائیوں کومزید تیز کردیاگیاہے ۔

انہوں نے کہا کہ مودی حکومت کے آپریشن سندور کی ناکامی کے بعدمقبوضہ علاقے میں انسانی حقوق کی خلاف ورزیوں میں مزید اضافہ کردیاگیا ہے۔

(جاری ہے)

انہوں نے کہا کہ ڈرونز اور ہیلی کاپٹروں سے لیس بڑی تعداد میں بھارتی قابض فورسز کی تعیناتی کے ذریعے کشمیر کو میدان جنگ میں تبدیل کردیاگیاہے۔ حریت ترجمان نے اقوام متحدہ سمیت عالمی برادری پر زور دیا کہ وہ تنازعہ کشمیر کے حل کے لیے اپنا اہم کردار ادا کرے کیونکہ تین جوہری طاقتیں اس تنازعے کی فریق ہیں جس سے پورے جنوبی ایشیا کے امن کو خطرہ لاحق ہے۔

ادھر بھارتی فوجیوں نے آج بھی وادی کشمیر اور جموں میں بڑے پیمانے پر تلاشی کی کارروائیاں جاری رکھیں۔ ضلع کشتواڑ میں پرتشدد کارروائی آج مسلسل پانچویں دن بھی جاری رہی۔ جموں میں فوجی کارروائی کادائرہ کار مزید بڑھانے کیلئے بھارتی فوج نے ضلع کٹھوعہ میں دو بریگیڈ تعینات اور ایک موبائل نیٹ ورک قائم کیا ہے۔ اس وقت بھارتی فوج کو کٹھوعہ، ڈوڈہ، کشتواڑ، اودھمپور اور جموں کے دیگر علاقوں میں شدید مزاحمت کا سامنا ہے۔

پولیس کے اسپیشل آپریشنز گروپ کے اہلکاروں کو بھی علاقے میں تعینات کیا گیا ہے۔ راجوری کے بعد اودھمپور میں ایک اور پراسرار موت کے واقع نے مقامی لوگوں میں شدید تشویش پیدا کر دی ہے۔انہوں نے دونوں واقعات کی شفاف تحقیقات کا مطالبہ کیا ہے۔ اس سے قبل راجوری کے علاقے بدھل میں ایک پل کے قریب سے ایک نوجوان خاتون کی لاش برآمد ہوئی تھی،اب قریبی ضلع اودھمپور میں ایک 40سالہ شخص پراسرار طورپرمردہ پایا گیاہے۔ آزاد جموں و کشمیر میں پاسبان حریت جموں و کشمیر کے زیر اہتمام ضلع نیلم کے علاقے اٹھمقام میں نکالی گئی ریلی کے شرکا نے اقوام متحدہ پر زور دیا کہ وہ جنوبی ایشیا میں قیام امن کے لیے تنازعہ کشمیر کے حل میں سہولت فراہم کرے۔