کل جماعتی حریت کانفرنس کے سربراہ غلام محمد صفی اور جملہ حریت قیادت سے بیرون ملک مقیم کشمیری رہنمائوں کے وفد کی ملاقات

اسلام آباد (اُردو پوائنٹ اخبارتازہ ترین - اے پی پی۔ 26 مئی2025ء) کل جماعتی حریت کانفرنس کے سربراہ غلام محمد صفی اور جملہ حریت قیادت سے بیرون ملک مقیم کشمیری رہنمائوں کے وفد نے ملاقات کی اور افواج پاکستان کی تاریخی اور شاندار فتح پر خراج تحسین اور کشمیر میں بھارتی ریاستی دہشت گردی کی شدید مذمت کی ہے۔یہاں جاری بیان کے مطابق کل جماعتی حریت کانفرنس کے اسلام آباد دفتر میں بیرون ممالک سے تعلق رکھنے والے کشمیری رہنمائوں محمد غالب،مزمل ایوب ٹھاکر ،ظفر قریشی نے کل جماعتی حریت کانفرنس کی جملہ قیادت سے ایک اہم ملاقات کی۔

اس ملاقات کا مقصد مقبوضہ جموں و کشمیر کی تازہ ترین صورت حال پر تبادلہ خیال، بھارتی جارحیت کے خلاف حکومتی و عوامی موقف کی حمایت اور مستقبل کے لائحہ عمل پر غور و خوض تھا۔

(جاری ہے)

ملاقات کے دوران بھارتی جارحیت کے خلاف افواج پاکستان کی کامیاب اور تاریخی دفاعی کارکردگی پر حکومت پاکستان، پاکستانی عوام اور خصوصاً افواج پاکستان کو دل کی گہرائیوں سے زبردست خراج تحسین پیش کرتے ہوئے کہا کہ مسئلہ کشمیر اس وقت ایک بار پھر عالمی سطح پر اجاگر ہوا ہے اور عالمی سطح پر مسئلہ کشمیر کو حل کرنے کے حوالے سے آواز بلند ہونا شروع ہوگئی ہے۔

مہمانان گرامی اور حریت قیادت نے اس امید کا اظہار کیا کہ افواج پاکستان اور حکومت پاکستان مسئلہ کشمیر کے پر امن، منصفانہ اور پائیدار حل کے لیے اپنی سفارتی، سیاسی اور اخلاقی کوششوں کو مزید موثر اور تیز تر بنائیں گے۔ملاقات میں بھارتی مقبوضہ کشمیر میں جاری ریاستی دہشت گردی، کشمیری مسلمانوں کی شناخت کو مٹانے کی مذموم کوششیں، غیر ریاستی باشندوں کی آبادکاری، آزادی پسند کشمیری عوام کے گھروں کو بارود سے اڑانے، جائیدادوں کی غیر قانونی ضبطی اور "پہلگام" جیسے سانحات کی آڑ میں ہزاروں کشمیری نوجوانوں کی بلا جواز گرفتاریوں پر شدید تشویش کا اظہار کیا گیا۔

اس امر پر زور دیا گیا کہ بھارتی حکومت مقبوضہ کشمیر میں خوف و ہراس کا ماحول قائم کرکے عوامی آزادیوں کو کچلنے کی پالیسی پر عمل پیرا ہے جو ناقابل قبول ہے۔شرکا نے اقوام متحدہ، اسلامی تعاون تنظیم اور دنیا بھر کے آزادی پسند اقوام و اقوام عالم سے مطالبہ کیا کہ وہ بھارت پر دبائو ڈالیں تاکہ مسئلہ کشمیر کو اقوامِ متحدہ کی قراردادوں اور کشمیری عوام کی امنگوں کے مطابق حل کیا جائے تاکہ کشمیری عوام کو اپنے سیاسی مستقبل کے تعین کا حق دیا جا سکے۔

حریت قیادت اور ڈائیسپورہ نمائندگان نے واضح کیا کہ اگر مسئلہ کشمیر کے حل میں ماضی کی طرح غفلت یا پس و پیش کی گئی تو جنوبی ایشیا ایٹمی جنگ کے دہانے پر پہنچ سکتا ہے جس کے عالمی امن پر سنگین اثرات مرتب ہوں گے۔ملاقات میں کشمیری تارکین وطن کی جانب سے مسئلہ کشمیر کے عالمی سطح پر اجاگر کرنے کی کوششوں کو سراہا گیا اور اس امید کا اظہار کیا گیا کہ یہ سرگرمیاں مزید تیز ہوں گی تاکہ دنیا بھارتی ظلم و ستم کا حقیقی چہرہ پہچان سکے اور کشمیری عوام کو ان کا حق خودارادیت دلوایا جا سکے۔

اجلاس میں جنرل سیکرٹری ایڈووکیٹ پرویز احمد ،سینئر حریت رہنما محمد فاروق رحمانی،میر طاہر مسعود، شمیم شال، محمد الطاف بٹ ،حاجی محمد سلطان، شیخ یعقوب،نثار مرزا، شیخ عبدالمتین، راجہ خادم حسین ،اعجاز رحمانی، جاوید اقبال،امتیاز وانی، زاہد صفی ،زاہد اشرف،شیخ عبدالماجد ،میاں مظفر، محمد شفیع ڈار، سید گلشن،عبدالمجید لون،عبدالمجید میر،خورشید میر،زاہد مجتبیٰ ،منظور احمد ڈار،قاضی عمران ، عدیل مشتاق ، خالد شبیر، قاضی عمران، بلال احمد اور سیکریٹری اطلاعات مشتاق احمد بٹ و دیگر افراد نے شرکت کی۔