اقلیتی اور پسماندہ علاقوں سے تعلق رکھنے والے طلبہ سول سروس کا حصہ بن کر قومی ترقی میں فعال کردار ادا کر سکتے ہیں، ڈی جی سول سروسز

ہری پور (اُردو پوائنٹ اخبارتازہ ترین - اے پی پی۔ 27 مئی2025ء) یونیورسٹی آف ہری پور میں انسٹی ٹیوٹ آف مینجمنٹ سائنسز کے ڈائریکٹر ڈاکٹر عبدالماجد اور رجسٹرار ریاض محمد کی سربراہی میں تقریب منعقد ہوئی ۔ ڈائریکٹر جنرل سول سروسز اکیڈمی لاہور فرحان عزیز خواجہ (پاکستان ایڈمنسٹریٹو سروس) نے تقریب میں خصوصی شرکت کی اور سی ایس ایس کے خواہشمند طلبہ کے لئے کیریئر کائونسلنگ سیشن سے خطاب کیا۔

یہ سیشن سول سروسز اکیڈمی کے نیشنل آئوٹ ریچ پروگرام کا حصہ تھا جس کا مقصد اقلیتوں اور کم نمائندگی والے علاقوں بشمول پنجاب (اقلیتی آبادی)، سندھ، خیبر پختونخوا، بلوچستان اور سابق فاٹا سے تعلق رکھنے والے نوجوانوں کو سی ایس ایس امتحان کیلئے تیار کرنا اور ان کو رہنمائی فراہم کرنا ہے۔

(جاری ہے)

یونیورسٹی آف ہری پور کے وائس چانسلر پروفیسر ڈاکٹر شفیق الرحمٰن نے ڈائریکٹر جنرل سول سروسز اکیڈمی کا پرتپاک استقبال کیا۔

انہوں نے کہا کہ سی ایس ایس امتحانات میں کامیابی کےلئے طلبہ کو نہ صرف علمی قابلیت بلکہ رہنمائی، حوصلہ افزائی اور درست سمت کی ضرورت ہوتی ہے اور اس ضمن میں سول سروسز اکیڈمی کا کردار قابلِ ستائش ہے۔ ڈائریکٹر جنرل فرحان عزیز خواجہ نے اپنے خطاب میں نہ صرف سول سروس کے مختلف شعبوں اور ان کے کردار پر روشنی ڈالی بلکہ امتحانی مراحل، تیاری کے موثر طریقہ، اختیاری مضامین کے انتخاب، وقت کی منصوبہ بندی، انٹرویو کی تیاری اور تحریری امتحان کے تقاضوں پر بھی طلباکو رہنمائی فراہم کی۔

انہوں نے خاص طور پر اقلیتی اور پسماندہ علاقوں سے تعلق رکھنے والے طلبہ کو اس شعبہ میں آگے آنے کی ترغیب دی تاکہ وہ قومی ترقی میں فعال کردار ادا کر سکیں۔ انہوں نے کہا کہ پاکستان کی سول سروس میں تنوع اور نمائندگی میں اضافہ وقت کی اہم ضرورت ہے، نیشنل آئوٹ پروگرام کا مقصد یہی ہے کہ ہم ہر طبقہ تک رسائی حاصل کریں اور انہیں قومی دھارے میں شامل کریں۔

اس موقع پر یونیورسٹی کے رجسٹرار ریاض محمد، ڈائریکٹر ایڈمن میجر (ر) محمد اقبال، مختلف فیکلٹی ڈینز، اساتذہ کرام اور یونیورسٹی کے مختلف شعبوں سے تعلق رکھنے والے طلبہ کی بڑی تعداد نے شرکت کی۔ سیشن کے دوران ڈائریکٹر جنرل نےشرکاکے سوالات کے جوابات دیئے۔ یونیورسٹی آف ہری پور کی جانب سے اس عزم کا اظہار کیا گیا کہ وہ مستقبل میں بھی سول سروسز اکیڈمی کے اشتراک سے اس نوعیت کے مزید تعلیمی و رہنمائی سیشنز کے انعقاد کےلئےتیار ہے تاکہ ملک کے پسماندہ اور کم نمائندگی والے علاقوں کے طلباکو سی ایس ایس اور دیگر مسابقتی امتحانات کےلئے بہتر رہنمائی فراہم کی جا سکے۔