پوری قوم اپنی بہادر مسلح افواج کے ساتھ سیسہ پلائی دیوار کی طرح کھڑی ہے، ڈاکٹر عشرت العباد خان

منگل 27 مئی 2025 23:30

اسلام آباد (اُردو پوائنٹ اخبارتازہ ترین - اے پی پی۔ 27 مئی2025ء) سابق گورنر سندھ ڈاکٹر عشرت العباد خان نے کہا ہے کہ افواج پاکستان نے بھارتی جارحیت کا منہ توڑ جواب دیکر قوم کے سر فخر سے بلند کر دیئے ہیں، پاکستان کسی بھی ملک کے خلاف جارحانہ عزائم نہیں رکھتا تاہم وہ دفاع پر کوئی سمجھوتہ نہیں کرے گا،فیلڈ مارشل جنرل عاصم منیر اور پاکستانی کی مسلح افواج کے سربراہوں کو خراج تحسین پیش کرتے ہوئے انہوں نے کہا کہ پوری قوم اپنی بہادر مسلح افواج کے ساتھ سیسہ پلائی دیوار کی طرح کھڑی ہے ۔

ان خیالات کا اظہار انہوں نے نیشنل پریس کلب اسلام آباد میں افواج پاکستان کے ساتھ اظہار یکجہتی کیلئے ہونے والی تقریب سے بذریعہ ویڈیو لنک خطاب کرتے ہوئے کیا۔ ڈاکٹر عشرت العباد خان نے کہا کہ آج کا دن اس لحاط سے بھی تاریخی ہے کہ ایک طرف ہم اپنے ازلی دشمن بھارت کیخلاف فتح کا جشن منا رہے ہیں جبکہ دوسری طرف یوم تکبیر بھی ہے جس دن اللہ تعالیٰ نے پاکستان کو مسلم امہ کی پہلی ایٹمی قوت ہونے کا اعزاز بخشا تھا۔

(جاری ہے)

بھارتی جارحیت کے بعد پاکستانی میڈیا اور آئی ایس پی آر کا کردار مثالی اور اہم تھا۔ انہوں نے کہا کہ اتحاد ہماری قوت ہے ، پاکستانی قوم کو چاہیئے کہ وہ پاکستان کی مضبوطی اور استحکام کیلئے نظریہ پاکستان کے ساتھ ساتھ آپس میں جڑے رہیں اور اتحادکو قائم رکھیں۔انہوں نے ریاست کو سیاست سے اہم اور مقدم قرار دیتے ہوئے کہا کہ ریاست ہو گی تو ہم ہونگے اور سیاست ہوگی لہٰذا دشمن کے پروپیگنڈے کو سمجھنے کی ضرورت ہے، پاکستان کی خدمت کا سفر آئندہ بھی جاری و ساری رہے گا۔

تقریب کی نظامت کے فرائض ڈاکٹر واجد مغل نے سرانجام دیئے جبکہ تقریب سے دوسروں کے علاوہ علی سید ، صائمہ نور، پیر بسم اللہ شریف، پاسٹر افضل بھٹی، ڈاکٹر سرفراز رابرٹ، مجیب الرحمان کیانی ایڈووکیٹ اورشیخ اعجاز علی نے بھی خطاب کیا۔